Ushtria ukrainase: Rusia po përpiqet të përparojë në rajonin jugor të Zaporizhzhia

21/01/2023 21:06

Forcat ruse po tentojnë një ofensivë në rajonin jugor të Zaporizhzhia, ndërkohë që po përpiqen të shtyjnë përpara në pjesë të Donetsk në lindje, njoftoi ushtria ukrainase.

Ushtria ruse “ka kryer ofensiva të pasuksesshme në sektorin Avdiivka (në Donetsk). Ajo vazhdon të tentojë një ofensivë në drejtimet Bakhmut dhe Zaporizhzhia, duke rritur intensitetin e përdorimit të aviacionit,” tha Shtabi i Përgjithshëm i Forcave të Armatosura të Ukrainës të shtunën në një deklaratë.

Shtabi i Përgjithshëm tha se kishte pasur edhe granatime ndërkufitare nga rusët në rajonet verilindore Sumy dhe Kharkiv.

Ai tha gjithashtu se administrata e emëruar nga Rusia në Kherson të pushtuar “po forcon kontrollin mbi regjistrimin e civilëve” në rajonin jugor.

“Në veçanti, po përpiqet të krijojë një bazë të dhënash të vendbanimeve të civilëve, duke kërcënuar se do të ndërpresë energjinë elektrike nën maskën e zbatimit të një ‘programi të kursimit të energjisë elektrike’”, thuhet në deklaratë.

Të shtunën, Ministria ruse e Mbrojtjes pretendoi se disa fshatra pranë qytetit të Orikhiv në Zaporizhzhia ishin fituar. Ukraina nuk i është përgjigjur pretendimit, por tha se “në sektorin Zaporizhzhia, zjarri artilerie goditi zona pranë më shumë se 25 vendbanimeve”.

Ka pasur raportime për luftime të ashpra rreth Bakhmutit, për të cilin zyrtarët rusë pretendojnë se po rrethohet ngadalë, dhe më në lindje rreth Kreminës në Luhansk, ku forcat ruse po kërkojnë të parandalojnë çdo përparim ukrainas përmes një zone pyjore aty pranë. Suksesi i Ukrainës në këtë fushë mund të komprometojë linjat e furnizimit të Rusisë drejt Bakhmutit.

Top Channel