Presidenti serb, Aleksandar Vuçiç deklaroi se marrëveshja e arritur në Bruksel ishte një fitore e vogël taktike, gjatë kohës që i përgjigjej pyetjeve lidhur me Kosovën dhe Metohinë.
Ai u shpreh se nuk duan luftëra, por kanë nevojë për paqe, ndërsa theksoi se negociatat janë në vazhdim.
“Vetëm dhjetë ditë më parë kur ishim në prag të konfliktit, të gjithë thoshin se çfarë po flisnim, ne kemi nevojë për paqe, nuk duam konflikte, nuk duam luftëra. Kur merr një vendim që do të thotë të ruash paqen, atëherë ata thonë se çfarë ke tradhtuar, çfarë ke sjellë. Unë insistoj që të respektohen të gjitha marrëveshjet e arritura më parë. Tabelat KM mbeten dhe vazhdojnë. Sa i përket makinave të reja janë 90 KM targa në vit. Ajo që është e rëndësishme për ne është që negociatat janë në vazhdim, targat KM janë të vlefshme. Kjo është një fitore e vogël taktike për sa i përket statusit. Na presin kohë të vështira, jam i kënaqur që e ruajtëm paqen për popullin tonë”, tha Vuçiç.
Presidenti serb deklaroi se gratë që dolën ditën e djeshme në protestë meritojnë paqe, ndërsa njerëzit janë ngopur me terrorin e pushtetarëve të Prishtinës, të cilët janë ngopur me shantazhe dhe ngacmime.
Sipas Vuçiç ky ishte një problem me të cilin atyre do t’iu duhet të përballen, ku shprehu edhe mirënjohjen e tij për popullin, ku edhe pas 23 vitesh terrori ata mbrojnë shtëpitë dhe familjet e tyre, por edhe luftojnë për Serbinë.
“Ato gra që dolën në protestë dje meritojnë paqe, kurse fëmijët e tyre të mësojnë në gjuhën serbe dhe sipas planprogramit serb. Sa i përket gjendjes aktuale me serbët në Kosovë, ajo po zien, po zien fjalë për fjalë. Njerëzit janë ngopur me terrorin e pushtetarëve të Prishtinës. Ata janë ngopur me shantazhe, ngacmime dhe duke u trajtuar si pakica kombëtare, sepse nuk janë. Dhe ky është një problem me të cilin duhet të përballemi, por gjithashtu tregon se sa e vështirë e kanë pasur dhe sa janë torturuar për 23 vjet. Prej 23 vitesh shqetësohesh nëse dikush do të të ngacmojë në kufi apo flet serbisht. I jam mirënjohës popullit tim që edhe pas 23 vitesh terrori mbrojnë shtëpitë dhe familjet e tyre, por edhe luftojnë për Serbinë”, shtoi më tej presidenti serb.
Ai gjithashtu tha se Përfaqësuesit evropianë edhe ata amerikanë ishin shumë racionalë, duke shtuar se u nxituan të zëvendësonin sa më shpejt përfaqësuesit serbë.
“Për sa i përket këtyre planeve që po flasin, disa herë e kam thënë se cilat janë vijat tona të kuqe. Përfaqësuesit evropianë ishin shumë racionalë, edhe amerikanët. E gjithë kjo është torturë. Ata nxituan të zëvendësojnë sa më parë përfaqësuesit serbë. E dëgjuat se çfarë thanë serbët, formimi i ZSO-së, kur të formohet, atëherë shkojmë në diçka tjetër. Edhe nëse dua apo jo, nuk mund t’i bind serbët. Sado e vështirë për ta, ata nuk i trembeshin forcës që i kërcënonte, sepse e dinin se vatra, shenjtërorja që po mbronin ishte më e madhe se kërcënimi”, tha Vuçiç.
Top Channel
