Administratori i Njësisë Administrative Graçen, kryeplaku i fshatit dhe babë e bir kanë rënë në pranga në Elbasan, pasi u sekuestrua 58 kilogramë lëndë narkotike kanabis.
Gjatë operacionit policor antikanabis të koduar “Bodin” u arrestuan në flagrancë, për veprat penale “Prodhimi dhe shitja e narkotikëve” dhe “Kultivimi i bimëve narkotike”, kryer në bashkëpunim, shtetasit: S. B., 62 vjeç, banues në fshatin Bodin, dhe Z. B., 27 vjeç, banues në Sarandë, babë e bir.
Nga kontrolli i ushtruar në tokën e këtyre shtetasve, në fshatin Bodin të njësisë administrative Graçen në Elbasan, janë gjetur dhe janë sekuestruar në cilësinë e provës materiale, 17 bimë të prera, të dyshuara narkotike kanabis.
Gjithashtu, gjatë kontrollit janë gjetur dhe janë sekuestruar 7 thasë të mbushura me kanabis, me peshë totale rreth 58 kilogramë.
Njëkohësisht, u arrestuan në flagrancë, për veprat penale “Shpërdorimi i detyrës” dhe “Moskallëzimi i krimit” F. S., 58 vjeç , banues në Elbasan, administratori i Njësisë Administrative Gracen, Elbasan dhe R. B., 62 vjeç, kryeplaku i fshatit Bodin.
“Finalizohet operacioni policor antikanabis i koduar “Bodin”, i zhvilluar me metoda hetimore proaktive. Kultivonin bimë narkotike në tokën e tyre, në fshatin Bobin, dhe më pas i përpunonin ato, arrestohen në flagrancë 2 shtetas (babë e bir). Në pranga gjithashtu, administratori i Njësisë Administrative Gracen, si dhe kryeplaku i fshatit Bodin, në Njësinë Administrative Gracen, Elbasan. Në kuadër të këtij operacioni, në hetim edhe 3 shtetas të tjerë, të dyshuar të implikuar në këtë veprimtari kriminale”, sipas policisë.
Po në kuadër të këtij operacioni, u proceduan penalisht 2 persona, për veprat penale “Prodhimi dhe shitja e narkotikëve” dhe “Kultivimi i bimëve narkotike”, kryer në bashkëpunim, si dhe një tjetër, për veprën penale “Moskallëzimi i krimit”.
Sipas policisë, në bashkëpunim me Prokurorinë pranë Gjykatës së Rrethit Gjyqësor Elbasan, vijon puna për zbardhjen dhe dokumentimin e plotë të këtij rasti, ndërsa materialet procedurale i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme.
Top Channel
