U denoncua nga “Fiks Fare”/ Arrestohet për shpërdorim detyre drejtori i postës së Dibrës dhe shefi i zyrës

Prokurorja Xhoana Mehmetaj ka firmosur urdhër arrestin edhe punonjësin e postës Gazmir Hasi, i cili akuzohet për vjedhje duke shpërdoruar detyrën dhe falsifikim dokumentesh.

Ky person sipas hetimeve ka vjedhur pensionet e qytetarëve, rreth 6 milion lekë (të rinj). Hasi ka mundur t’i shpëtojë policisë, pasi ende nuk është arrestuar. Dy shefat e tij, drejtori i postës dhe shefi i zyrës akuzohen se nuk e kanë pikasur vjedhjen, edhe pse në dokumentacionet e plotësuara nga Hasi ka parregullsi. Sipas hetimeve ata kanë pasur dijeni për veprimet e vartësit te tyre.

E gjitha parregullsia, sipas veprimeve hetimore të kryera, dyshohet se ka ndodhur në periudhën janar-maj të këtij viti.

Një muaj më parë, emisioni investigativ “Fiks Fare”, denoncoi skandalin me pensionet e dhjetëra banorëve të Peshkopisë, të cilët po endeshin në dyert e institucioneve shtetërore.

Punonjësi i Postës, Gazmir Hysi, i cili duhet t’ua shpërndante, u zhduk, bashkë me një shumë të majme monetare. Në redaksinë e emisionit mbërriti një informacion për këtë problematikë. Gazetarët biseduan me dhjetëra pensionistë në Peshkopi dhe Njësinë Administrative Kastriot.

Pjesë nga biseda e gazetarëve të Fiksit me pensionistë dhe punonjës të Postës në Peshkopi:

Pensionistja – E kanë hequr Gazin?

Fiksi – Pse?!

Pensionistja – Nuk e di, i ka pas dhënë Gazi këto pensionet dhe asistencën.

Fiksi – Po pra.

Pensionistja – Ai la nam. Kena pas Fate Shaini, thoshte të vish a me 17, me 22, 20 nuk kishte datë të caktuar kërkund o bir.

Fiksi – Ka marrë lekët e pensioneve e nuk ua ka dhënë?

Pensionistja – Ka njeri që se ka marrë hiç. Mua më thanë ka gjet shtëpi në Tiranë.

Fiksi – Ëëë.

Pensionistja – Thanë ka gjet shtëpi në Tiranë. Këtu s’ka shtëpi, ka shku në Tiranë ai.

Pensionisti – Unë kam pasur me marrë pensionin që më datë 20 (maj), sot është data dy (qershor). Edhe plaka kështu s’i kemi marrë.

Fiksi – Mos ka pasur me t’i dhënë Gazi edhe ty?

Pensionisti –Po.

Pensionistja – S’i kanë marrë edhe të tjerët!

Fiksi – Po Gazi nuk është këtu, e kanë hequr?

Pensionisti – Ku di gjë!

Fiksi – Që me 20 (maj) ke pasur ti me marrë?

Pensionisti –Po.

Fiksi – Data sot …

Pensionisti – 2 (qershor).

Fiksi – Ç’a thonë?

Pensionisti – Nuk di gjë hiç, nuk kam vajtur kërkund. Llafe mileti, jo është këtej, jo është andej, jo ka bërë budallëqe.

Pensionistja – 30 mijë lekë asistencë.

Pensionisti a 2 – Ha mo ani, ani edhe unë s’i kam marrë.

Fiksi – Çfarë date ke pas me i marrë?

Pensionisti   – Po kjo thotë s’i kam marrë.

Pensionistja 2 – S’i kam marrë jo!

Fiksi – S’i ke marrë hiç?

Pensionistja 2 – Jo mo jo fare. Kemi ardhur lartë e poshtë se jam edhe me tension. Sa këtu, sa këtu, sa këtu, sa këtu.

Fiksi – Ç’a të thonë?

Pensionistja – Laju sot se të rruajmë nesër!

Pensionistja 2 – Një herë tha dua letrën, ku me shku! Nejse, ikëm. Ene hajde mos e gjej, hajde mos e gjej.

Fiksi – Sa herë ke ardhur?

Pensionistja 2 – Eh sa herë kam ardhur?! Ku e di unë tani, që me datë 10 që merrem. Tani e kam lënë se nuk kam takat me ardh këtu.

Fiksi – I ka marrë për vete?

Pensionistja 2– Zoti e di, s’e di!

Pensionistja 3 – Të asistencave.

Fiksi – Sa muaj ke pa marrë pensionin?

Pensionistja 2 – Një muaj.

Fiksi – Një muaj …

Pensionistja 2 – A t’u ardh data tjetër, me datë 10 vjen pensioni tjetër. Ku të ha, i kam marrë borxh, i kam marrë lekë tani.

Top Channel