Xhubleta më shumë se 100 vjeçare në ankand ne programin “Artkand”

Kjo Xhubletë i përket krahinës Kelmend- Dukagjin, me përmasa 175×125 cm,  mbi 100 vjeçare, së bashku me stolitë përkatëse me çmimi fillestar 8000 euro.

Prodhimi i xhubletës tradicionale me të gjithë parametrat e saj ka ndalur në vitet ’50 apo ’60. Të prodhohet një xhubletë kërkonte 6 deri në tetë muaj.

Xhubleta në trajtë kambane, e valëzuar në pjesën e pasme, ruante fort mirë në kohë lufte identitetin e kombit shqiptar, nëpërmjet motiveve edhe simboleve të ndryshme, që tregojnë besimin në Zot edhe bukurinë e femrës malësore.

Arkivi shtetëror ka rreth 33 xhubleta. Koleksionet private shkojnë nga disa dhjetëra në qindra.

Studiuesja Luljeta Dano u shpreh se xhubleta është aq e vjetër dhe e rëndësishme sa vetë gjuha shqipe.

Veshja konsiderohet unike për shkak të formës, strukturës dhe mënyrës se si është zbukuruar me grep. Gratë e martuara zakonisht veshin një të zezë, ndërsa të pamartuara veshin të bardhë.

Antropologia, autorja dhe gazetarja Edith Durham bëri disa referenca për xhubletën në librat e saj mbi vizitat në veri të Shqipërisë.

“Vajzat dhe gratë janë të veshura ndryshe. Veshja e vajzave është prej leshi të trashë, të ngurtë, të bardhë me vija të zeza horizontale. “shkroi ajo.

Top Channel