Irani konfirmon se do t’i diskutojë çështjet bërthamore me tri shtete perëndimore/ Pritet të gjejë zgjidhje para rikthimit të Trump 24/11 15:21
Rusia premtoi të martën të reduktojë operacionet ushtarake rreth Kievit dhe qytetit Chernihiv, por Shtetet e Bashkuara paralajmëruan se rreziku nuk ka marrë fund.
Ky zhvillim vjen ndërsa Ukraina propozoi miratimin e një statusi neutral në shenjë progresi në negociatat që po zhvillohen ballë për ballë mes palëve.
Bisedimet u zhvilluan në Stamboll ndërsa është shënuar më shumë se një muaj që kur Moska sulmoi Ukrainën, një konflikt që ka shkaktuar vrasjen e plagosjen e mijëra personave, ka detyruar afro 4 milionë ukrainas të largohen nga vendi si dhe ka goditur rëndë me sanksione ekonominë e Rusisë.
Forcat ushtarake ruse janë frenuar në shumicën e fronteve për shkak të rezistencën së fortë nga trupat ushtarake ukrainase që kanë rimarrë territore, megjithatë civilët vazhdojnë të jenë të bllokuar në qytetet e rrethuara.
“U mor një vendim për të reduktuar rrënjësisht, me një diferencë të madhe, operacionet ushtarake në drejtim të Kievit dhe Chernihivit“, u tha gazetarëve të martën zëvendësministri rus i Mbrojtjes Alexander Fomin.
Por ai nuk përmendi zonat e tjera që janë ndeshur me luftime të ashpra, sikurse Mariupoli në juglindje, Sumy dhe Kharkivi në lindje dhe Khersoni dhe Mykolaivi në jug të Ukrainës.
I pyetur nga gazetarët lidhur me komentet e Moskës, Presidenti Joe Biden tha të martën se vendet aleate perëndimore janë duke pritur të shohin nëse Rusia do të përmbushë angazhimin që ka marrë për të reduktuar sulmet rreth kryeqytetit të Ukrainës, Kievit dhe qytetit verior të Chernihivit.
Komentet Presidenti Biden i bëri pas një bisede telefonike me udhëheqësit e Mbretërisë së Bashkuar, Francës dhe Italisë. “Duket se ka një konsensus (mbi këtë çështje) të shohim se çfarë kanë për të ofruar“, tha zoti Biden.
Rusia ka filluar të largojë një numër shumë të vogël trupash nga pozicionet rreth Kievit, në një lëvizje që është më shumë një ripozicionim sesa një tërheqje tha Pentagoni të martën.
“Kjo nuk do të thotë se rreziku ndaj Kievit ka marrë fund“, tha zëdhënësi John Kirby në një konferencë shtypi.
Zoti Kirbi tha se 10 avionë amerikanë F-18 dhe më shumë se 200 trupa janë dislokuar Lituani një vend anëtar i NATO-s dhe fqinj me Rusinë. Nga ana tjetër trupat amerikane në Poloni po ndërveprojnë me forcat ukrainase duke u dorëzuar armët.
Rusia e quan sulmin në Ukrainë një operacion special ushtarak për të çarmatosur dhe hequr qafe siç thotë nazizmin dhe ndikimin e tij në këtë vend. Por Perëndimi thotë se Moska ka nisur një sulm të paprovokuar.
Disa analistë vunë re se premtimi i Rusisë për të reduktuar luftimet mbulonte kryesisht zonat ku ajo ka humbur terren.
Presidenti i Ukrainës Volodymyr Zelenskiy tha se vetëm një rezultat konkret nga bisedimet mund të ishte i besueshëm.
“Mund të themi se sinjalet që marrim nga bisedimet janë pozitive, por ato nuk po i mbysin shpërthimet e predhave ruse“, tha ai./VOA
Top Channel
