Foto ilustruese

Policia e Lezhës ka arrestuar një person dhe ka proceduar 10 të tjerë penalisht pasi bllokuan aksin rrugor Lezhë-Shkodër, në shenjë revolte për rritjen e çmimit të karburantit, por edhe të ushqimeve.

Në një njoftim për mediat, policia sqaron se këta persona bllokuan rrugën duke mos lejuar kalimin e automjeteve në të dy senset e lëvizjes në rrugën Lezhë-Shkodër dhe për këtë arsye u arrestua  në flagrancë 1 shtetas, si dhe u proceduan penalisht 10 të tjerë.

Specialistët për Hetimin e Krimeve në Komisariatin e Policisë Lezhë arrestuan në flagrancë për veprat  penale “Organizimi dhe pjesëmarrja në protestë të paligjshme “, “Pengimi i qarkullimit të mjeteve të transportit”dhe “Kundërshtimi i punonjësit të Policisë shtetasin Gj.Gj., banues në Lezhë, si dhe proceduan penalisht shtetasit E.L., K.Sh., K.Ll., F.Ll., E.Ll., A.N., L.N.,L.Gj.,G.K.,dhe  D.F., pasi në vendin e quajtur “Rrethrrotullimi i Shëngjinit” kanë bërë bllokimin e aksit rrugor Lezhë-Shkodër duke mos lejuar qarkullimin e mjeteve nga të dy senset e lëvizjes.

Materialet i kaluan Prokurorisë pranë Gjykatës së Shkallës së Parë Lezhë, për veprime të mëtejshme.

Drejtoria Vendore e Policisë Lezhë, apelon për të gjithë qytetarët që të mos bllokojnë lëvizjen e lirë të mjeteve dhe qytetarëve sepse do të përballen me forcën e ligjit.

Top Channel