Një 48 vjeçar është arrestuar nga policia pas ndërhyrjes në kohë të forcave të policisë.
Bëhet fjalë për shtetasin A.G., I cili kishte qëlluar në ajër me pistoletë sportive duke terrorizuar banorët në Kodrën e Priftit, Tiranë.
Kanë qenë këta të fundit të cilët kanë kallëzuar në polici 48-vjeçarin, ndërsa ky I fundit është arrestuar në flagrancë dhe pas kontrolli të ushtruar në shtëpi iu gjetën 4 pistoleta sportive si dhe një shotgun me shënjestër optike.
“Shërbimet e Komisariatit të Policisë Nr. 4 në Tiranë, pas marrjes së njoftimit nga banorët se në Kodrën e Priftit, kishte të shtëna me armë zjarri, menjëherë kanë shkuar në drejtim të adresës së dhënë.
Nga verifikimet e shpejta dhe bashkëpunimi me qytetarët u bë e mundur identifikimi, kapja dhe arrestimi në flagrancë për veprat penale të “Prodhimi dhe mbajtja pa leje e armëve të gjuetisë dhe sportive” dhe “Prishja e qetësisë publike”, i shtetasit: A. G., 48 vjeç, banues në lagjen “Kodra e Priftit”.
Gjatë kontrollit në banesën e 48-vjeçarit, shërbimet e Policisë gjetën dhe sekuestruan në cilësinë e provës materiale 4 pistoleta sportive të llojeve dhe markave të ndryshme që përshtaten edhe si armë zjarri si dhe një shotgun me shënjestër optike, pa lejen përkatëse.
Gjithashtu u sekuestruan në cilësinë e provës materiale edhe 6 gëzhoja që ky shtetas kishte qëlluar me fishekë manovër, duke terrorizuar banorët”, thuhet në njoftimin e policisë.
Materialet procedurale në ngarkim të këtij shtetasi do ti kalojnë Prokurorisë së Rrethit Gjyqësor Tiranë, për veprime të mëtejshme.
Top Channel
