Përfaqësues të partive politike, që përbëjnë shumicën parlamentare shprehën mbështetjen për qeverinë në takimin me kryeministrin Zoran Zaev. Ata konfirmuan se shumica parlamentare është e qëndrueshme dhe përgjegjëse ndaj së ardhmes së shtetit
Partnerët e koalicionit kanë kërkuar nga kryeministri Zaev të rishqyrtojë vendimin e tij për dorëheqje nga funksioni i kryeministrit si dhe nga pozita e kryetarit të partisë. Në takimin e partnerëve të koalicionit qeveritar u konstatua se zgjedhjet e reja nuk janë të nevojshme, dhe se ato vetëm sa do ta zhysnin vendin në krizë politike, ekonomike dhe do të frenonin procesin e integrimit europian. Zëvendëskryeministri i parë, Artan Grubi i BDI-së e cilësoi të nxituar dorëheqjen e shefit të ekzekutivit.
“Ne dhamë të gjithë njëzëri në takim përkrahje për shumicën parlamentare, për programin e Qeverisë dhe vazhdimin e politikave qeveritare, në veçanti në aspektin e integrimit europian, të reformave, aspektin e sigurisë dhe e siguruam kryeministrin Zaev, ne dhe partnerët e tjerë të koalicionit, se jemi njëzëri në mbështetje të politikave qeveritare”, deklaroi Grubi.
Në shumicën parlamentare mbetet edhe PSD e Tito Petovski. Ai tha se vendit nuk i duhen zgjedhje të parakohshme parlamentare, por një përbërje e re qeveritare nga partitë politike në pushtet. Edhe sekretari i përgjithshëm i Lëvizjes Besa, Arjanit Hoxha vlerëson se në këtë situatë politike zgjedhjet e parakohshme mund të shkaktonin komplikime të mëtejshme në aspektin ekonomik, social, shëndetësor dhe të sigurisë.
Top Channel
