Një incident i rëndë është shënuar mesditën e sotme në Zonën e Parë të një subjekti minerar në Bulqizë.
Sipas informacionit të dhënë nga policia mësohet se ka patur rënie të një masivi minerali dhe paraprakisht dyshohet se ka mbetur i bllokuar brenda në galeri një punëtor.
“Me datë 15.09.2021, rreth orës 12.10, në një subjekt minerar në Bulqizë, ka patur një rënie të një masivi minerali dhe nga informacionet paraprake të punëtorëve, dyshohet se ka mbetur i bllokuar në galeri një punëtor”, thuhet në njoftimin e policisë.
Muharrem Plaku, me detyrë teknik dhe zjarrmëtarë është minatori i cili ka mbetur i bllokuar brenda minierës pas rënies të masivit me minerale.
Top Channel mëson se ngjarja ka ndodhur që në orën 09:00 të mëngjesit të sotëm, ndërkohë që prej më tepër se disa orë vijon puna për pastrimin e mineralit të kromit për të bërë të mundur nxjerrjen jashtë të minatorit.
Plaku punon prej tetë vitesh në këtë subjekt minerar, ndërkohë që ende nuk dihet asgjë për gjendjen e tij shëndetësore.
Grupi hetimor ka nisur punën vijon për zbardhjen e shkaqeve të ngjarjes.
Vetëm pak momente më parë ka mbërritur edhe grupi i avari shpëtimit te Tiranës.
Top Channel
