Jo vetëm “ylli” i Milanit, Bayerni synon t’i “rrëmbejë” dy lojtarë Guardiolës 24/05 15:52
Mes protestave të tifozëve që kërkonin largimin e presidentit Steven Zhang, Interi tregoi një nivel të lartë loje dhe mori një fitore të pastër në ndeshjen e parë pa Romelu Lukakun, pasi triumfoi me shifrat 0-2 në miqësoren e zhvilluar në Enio Tardini përballë Parmës.
Pa Hakan Calhanoglu i cili nuk luajti në këtë sfidë për shkak të një problemi muskular, por me treshen Barella-Brozovic-Sensi në mesfushë dhe dyshen amerikano-jugore Satriano-Lautaro Martinez në sulm, skuadra e Simone Inzaghit u shfaq në lartësinë e duhur në një duel ku klima ishte e tensionuar që në fillim.
Nga 3000 të pranishmit në stadiumin Tardini, më shumë se 600 ishin tifozë të Interit të cilët me pankarta dhe kartmonedha në duar, kontestuan shitjen e Romelu Lukakut te Chelsea duke kërkuar largimin e presidentit Steven Zhang. “ Zhang koha juaj mbaroi! Zhang nëse doni ta shpëtoni Interin atëherë duhet të largoheni”, lexohej në disa nga pankartat me tifozët zikaltër që përdorën edhe koret kundër presidentit. Me kartëmonedha 10 euroshe në duar, ata dëgjoheshin teksa këndonin dhe thoshin: “Duhet të shesësh”, “Ne do t’ju japim paratë”.
Situatë kjo që tregon se tifozët e Interit nuk janë aspak të kënaqur me menaxhimin që i është bërë klubit nga ana e kinezëve të cilët edhe pse rikthyen titullin kampion në Milano pas 11 vitesh, shitën në këtë merkato verore dy nga emrat më sugjestionues në skuadër Romelu Lukakun dhe Achraf Hakimin.
Përsa i përket sfidës ndaj Parmës pas një pjese të parë pa gola, Interi realizoi dy herë në fraksionin e dytë. Fillimisht zikaltrit e Simone Inzaghin pasi panë t’iu mohoeshin disa gola të sigurt nga portieri i vendasve Colombo, goditën edhe shtyllën me Nicolo Barellan, ndërkohë që ndeshja u zhbllokua nga Marcelo Brozovic në minutën e 59-të pas përpjekjeve në zonë të Lautaro Martinez që shërbeu për kroatin, ndërkohë që fitorja u vulos nga dy lojtarë të ardhur nga stoli.
Krosim perfekt i Federico Dimarcos për Matias Vecinon që në minutën e 69-të shënoi me kokë golin e dytë për Interin. Të shtunën në Monza, zikaltrit do të kenë testin gjeneral para startit të kampionatit pasi do të sfidojnë ukrainasit e Dynamo Kiev që janë shumë para me përgatitjet dhe kanë filluar kampionatin në vendin e tyre.
Top Channel
