Turqi/ Zjarrfikësit vijojnë përpjekjet për të vënë nën kontroll flakët në Manavgat

06/08/2021 19:26

Zjarri në pyjet e rrethit Manavgat të provincës Antalya në Turqi vijon të jetë ende aktiv.

Zjarri që shpërtheu më 28 korrik, i ndihmuar nga era, u përhap në një zonë më të madhe në një periudhë të shkurtër kohore. Ekipet në terren po bëjnë përpjekje të mëdha për të vënë nën kontroll zjarrin.

Zjarri është aktiv edhe në zonën Kızıldağ.

Ekipet zjarrfikëse vazhduan aktivitetet e tyre të shuarjes së zjarrit edhe gjatë natës, ndërsa me rrezet e para të diellit, mbështetja erdhi nga ajri.

Autoritetet turke thanë se më shumë se 150 zjarre pyjorë shpërthyen në jugperëndim të vendit javën e kaluar për shkak të temperaturave të larta, lagështisë së ulët dhe erërave të forta.

Tetë persona mbetën të vdekur nga flakët e pamëshirshme dhe mijëra u evakuuan, përfshirë edhe turistë të cilët kishin zgjedhur Taurqinë si destinacionin e tyre të pushimit për këtë verë.

Top Channel