Kufizimet lokale dhe ato rajonale për të luftuar variantin indian të koronavirusit nuk mund të përjashtohen, ka thënë qeveria britanike, teksa ka shprehur shqetësim për shpejtësinë e përhapjes së këtij varianti në Mbretëri të Bashkuar.
Kufizimet “ekonomike dhe sociale” mund të rikthehen në disa pjesë të këtij shteti, nëse është e nevojshme, raporton Radio Evropa e Lirë.
Masat mund të përfshijnë përshpejtimin e marrjes së dozës së dytë të vaksinës për disa njerëz që jetojnë në zonat më të prekura. Gati 36 milionë banorë kanë marrë të paktën një dozë të vaksinës kundër koronavirusit.
Sistemi Publik Shëndetësor ka regjistruar 1.313 raste të variantit indian në Mbretërinë e Bashkuar.
Departamenti për Kujdes Shëndetësor dhe Social ka thënë se “nuk ka të dhëna të qarta që tregojnë se ky variant ka ndikim më të madh në sëmurje më të rëndë apo që i shmanget vaksinës”.
Faza tjetër e lehtësimit të kufizimeve në këtë shtet pritet të nisë më 17 maj. Të enjten, Mbretëria e Bashkuar ka regjistruar 11 viktima dhe 2.657 raste me koronavirus.
Sipas Sistemit Publik Shëndetësor, vaksinat kanë ruajtur jetët e 11.700 personave dhe kanë parandaluar sëmurjen e rëndë të 33,000 të tjerëve.
Top Channel
