24-vjecari Markeljan Cungu, i shpallur në kërkim ndërkombëtar, ka rënë në prangat e policisë, pasi ishte shpallur në kërkim ndërkombëtar për katër vepra penale.
Në njoftimin e policisë bëhet e ditur se Gjykata e Rrethit Gjyqësor të Tiranës e ka dënuar me 25 vjet burgim. Cungu akuzohet si autor i grabitjes dhe plagosjes më pas të një çifti në Allias.
Njoftimi i policisë:
Nga specialistët për Hetimin e Krimit në Komisariatin e Policisë Nr.4 u bë ekzekutimi i vendimit, për shtetasin në kërkim ndërkombëtar, i ekstraduar nga Kosova, Markeljan Cungu, 24 vjeç, banues në Tiranë, sepse Gjykata e Rrethit Gjyqësor Tiranë, e ka dënuar me 25 vite burgim, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Vjedhja me armë”, e kryer në bashkëpunim e mbetur në tentativë, “Plagosja e rëndë me dashje” dhe “Plagosja e lehtë me dashje”.
Si u krye grabitja?
Burime të gazetares së Top Channel, Anila Hoxha thonë se ka qenë një analizë ADN-je, më saktë një një kampion pështyme në një nga maskat e gjetura jo shumë larg vendit të ngjarjes, që ka çuar në identifikimin e njërit prej autorëve pjesëmarrës në këtë grabitje Fatjon Mertënikaj, ndërsa është shpallur në kërkim Markelian Cungu, që është vjedhës serial në kryeqytet.
Po ashtu burime të Top Channel, thonë se në kërkim në lidhje me ngjarjen është dhe një person i tretë, Marjo Toçi, i cili nuk ka treguar ngjarjen sepse ja ka treguar Markeljani duke i thënë ” çunat kanë bërë një punë mbrëmë”.
28-vjeçari, Mertënikaj deklaroi se “Plani për grabitjen e çiftit Petrit dhe Afërdita Laze në Allias të Tiranës, është thurur nga Markelian Cungu”.
Ai tha se plani është ideuar nga Markeliani, po ashtu ka qenë ai që ka siguruar armët, një automatik dhe një pistoletë, ku automatikun ja kishte dhënë Fatjonit ndërsa pistoletën Markeliani e ka mbajtur vetë.
“Më dha automatikun ndërsa pistoletën e mbajti vetë, kemi hyrë në banesë natën vonë, pasi Markeliani më tha se në shtëpi nuk banonte njeri. Por jemi ndeshur me përballjen e të zotit të shtëpisë, ndaj dhe kemi reaguar me armë…”-ka treguar Fatjon Mertnikaj.
Të veshur me përparëse grash ngjyrë të zeza dhe me maska, siç pohoi Mertnikaj, ata u futën në banesë për të vjedhur.
Pas ngjarjes, policia ka arritur të nxjerë kampione pështyme, pikërisht në njërën prej këtyre maskave të sekuestruara jo shumë larg vendit të ngjarjes.
Dhe pas analizave në laboratorin e policisë shkencore është arritur të identifikohet se njeriu që kishte marrë pjesë në këtë grabitje me pasoja të rënda, ishte Fatjon Mërtnikaj.
Mertnikaj u thirr disa herë në polici, para arrestimit, ku u morën kampione të tjera, derisa për tiu shmangur një arrestimi të mundshëm, Mertnikaj mbrëmjen e djeshme është nisur me taksi nga Tirana në drejtim të Rinasit ku kishte planifikuar largimin e tij nga Shqipëria në drejtim të Italisë me qëllim shmangien e procedurave të hetimit. Por pa sukses.
Tashmë pritet që 28-vjeçari i arrestuar të dalë para gjykatës së Tiranës për tu njohur me masën e sigurisë “arrest në burg”, ndërsa për Markelian Cungun është marë masa “arrestit në burg” në mungesë.
Top Channel
