Ardian Dovorani “shpërfill” Ilir Metën: Për mua ka rëndësi kushtetuta e institucionet, jo personat

Dvorani është shprehur se ndihet tepër i vlerësuar dhe krenar për këtë çmim dhe dëshiron ta ndajë me kolegët që në vite kanë bërë maksimumin.

“Isha në dijeni që diçka po përgatitej, por jo nivelin mbi të cilin do vlerësohesha. Nëse është burokratik apo jo nuk mund ta them, SHBA bën gjëra të menduara mirë. Vlerësimi i DASH nuk lidhet me një çështje konkrete, por me gjithë veprimtarinë time. Ndihem krenar dhe i vlerësuar, por dua ta ndaj edhe me kolegët që në vite kanë bërë maksimumin”, tha ai.

Juristi Ardian Dvorani ka një histori të gjatë në sistemin e Drejtësisë në Shqipëri, por një angazhim shumë domethënës në Reformën në Drejtësi. Së fundmi ai është gjetur në sulmin e Presidentit Ilir Meta, për shkak të angazhimit të tij në procesin e ndërtimit të institucioneve të reja të drejtësisë pas reformës në drejtësi. Meta bëri edhe padi ndaj Drovanit, i cili shprehet se jo vetëm Presidenti po kushdo tjetër ka të drejtën të veprojë si të dojë dhe këto sulme nuk e shqetësojnë aspak.

Dyrnjaja: Përse po ju sulmon kaq shumë Presidenti i Republikës?

Dvorani: Presidenti i Republikës dhe kushdo qoftë ka të drejtën e tij të veprojë ashtu si e vlerëson. Ky nuk është problemi im fare, raportet i kam me Kushtetutën, ligjin dhe institucionet dhe mua nuk më shqetëson fakti si më vlerësojnë personat publik. Detyrimi im është që ashtu si në të kaluarën dhe në të ardhmen të vazhdojë të ushtrojë detyrimin tim gjyqësor. Nuk kam asnjë arsye të ndjek se çfarë deklarojnë politikanët apo funksionarë të ndryshme për këtë çmim. Vlerësimin tim e ka bërë DASH, është e sqaruar qartë. Diçka ka shkruar edhe Ambasada e SHBA, të tjerët po më komentojnë mua apo vlerësimin që më kanë bërë?

Presidenti Ilir Meta, në një deklaratë për media ditën e sotme e cilësoi fletëlavdërimi të Ramës, deklaratën e sekretarit amerikan të shtetit që i jepte çmim vlerësues gjykatësit Dvorani.

Dyrnjaja: Presidenti ju ironizoi duke e cilësuar vlerësimin e DASH si një fletë lavdërimi duke iu pozicionuar edhe politikisht në të ashtuquajturën “Ramareformë”.

Dvorani: Unë përpiqem t’i ndjek reagimit, është e drejta dhe detyrimet e mia. Po se çfarë kanë ndodhur sot si kam ndjekur. Ky është problemi i tij dhe gjithsecili në funksionin e vet duhet të jetë i përgjegjshëm dhe i kujdesshëm për atë që po nxjerr nga goja.

Në “Top Talk” u diskutua edhe rreth “betejës” mes presidentit dhe Dvoranit dhe opinionit të dhënë nga Komisioni i Venecias për sa i përket ngërçit të krijuar në ngritjen e Gjykatës Kushtetuese.

Dyrnjaja: Keni humbur betejën me Presidentin në Venecia por keni fituar vlerësimin në SHBA. Cili është më i rëndësishëm për ju?

Dvorani: Unë nuk shikoj as fitore dhe as humbje në opinion ligjor që ka dhënë Komisioni i Venecias. Ai opinion duhet lexuar në tërësi të tij, i trajton çështjet në mënyrë të gjithanshme. Ka dhënë interpretimet dhe shpjegimet dhe këndvështrimin e tyre mbi mënyrën si duhet të zbatohet Kushtetuta dhe ligji, në rastin e procedurave për zgjedhjet dhe emërimet në Gjykatën Kushtetuese. Ka trajtuar situatën e veçantë me kandidimet në vitin 2020 dhe ka thënë që përjashtimisht në këtë rast nuk ishte e paarsyeshme dhe e justifikueshme që Presidenti të bënte disa zgjedhje dhe të mbante qëndrime të caktuara. Është e rëndësishme se Komisioni i Venecias i ka dhënë një përgjigje përfundimtare se çfarë kuptohet me radhë me emërimet e gjyqtarëve në Gjykatën Kushtetuese dhe këtë njerëzit duhet të marrin mundimin ta lexojnë.

Venecia i ka dhënë shpjegimet, radhët se kush institucion ka autoritetin për të proceduar. Ata kanë dhënë një shpjegim që në situatën që ishte krijuar aplikohej për herë të parë kjo formulë kushtetuese mund të quhej e justifikuar një sjellje ndryshe nga organet e emërtesës. Ky është një diskutim shumë i detajuar dhe do të ftoja ata që janë profesionistë të fushës ta analizojnë këtë opinion. Edhe në emërimet që u bënë 3 muaj në Gjykatën Kushtetuese, të dy organet emërtesës vepruan normalisht duke respektuar kushtetutën, radha ishte e përcaktuar tashëm dhe të gjitha elementët që u kontestuan me të madhe, tashmë para tre muajsh u quajtën normalitet dhe arritje.

Dyrnjaja: Duke qenë larg konfliktit të interesit në raport me krijimin e Gjykatës Kushtetuese dhe asaj të lartë, si e gjykoni këtë proces që vijon?

Dvorani: Procesi i plotësimit vakante në Gjykatën Kushtetuese dhe atë të lartë mori shumë kohë, më tepër sesa duhet. Nuk mund të them se ka faktorë që e kanë vonuar. Nuk më takon ta analizoj veprimtarinë e këshillave të emërimeve në Drejtësi të mëparshme, por KED i vitit 2019 ishte i detyruar të përgatiste të gjithë kuadrin normativ, kjo mori kohën e vet. Dhe më pas ishte aplikimi për herë të parë i një kuazivettingu që i bëhej kandidatëve, proces që merr kohë. Kështu edhe KED-in do të merrte kohë. Veprimtaria erdhi duke u përmirësuar. Jo rastësisht, kolegët proceduan në mënyrë më të shpejtë, përvoja tregoi se tashëm skemat u vendosën si duhet të procedojnë dhe gjërat mund të funksionojnë. Për Gjykatën e Lartë është më e komplikuar situata sepse aty ka kandidatë të cilët ende s’kanë kaluar procesin e vettingut, kështu mbahet e gjithë lista peng dhe KLGJ nuk arrin të votojë.

Në reagimin që kryeministri Edi Rama bëri dje pas vlerësimit nga DASH për Ardian Dvoranin, shkruante se ky është një inkurajim i jashtëzakonshëm për ata persona që luftojnë për Reformën në Drejtësi në vend, që ndodhet në një fazë kacafytjesh me të keqen, duke shtuar se Dvorani u godit harbutërisht, për faktin se nuk iu dorëzua presionit të së keqes.

Dyrnjaja: Mazhoranca ju ka dalë në mbrojtje me qëndrimet e saj. Mbrojtjen politike e keni të nevojshme?

Dvorani: Unë kam të nevojshme të kem paketën ligjore përpara dhe një libër të kushtetutës dhe ti respektoj. Ata që më dalin në mbrojtje dhe më sulmojnë i respektoj. Secili është i lirë të mbajë qëndrimin e vet. Secili ka interesat e veta unë nuk mund të shfokusohem dhe ta bazoj jetën time personale mbi humorin e kujtdo qoftë. I dëgjoj dhe i respektoj, reflektoj aty ku ka vend për të reflektuar dhe hedh në kosh ato që janë për të hedhur.

Top Channel