“Për’Puthen” thyen rekorde shikueshmërie/ Arrin në mbi 200 milionë klikime që prej fillimit të sezonit

Që prej nisjes së këtij ‘fenomeni’, që “troket” nga e hëna në të premte në shtëpitë e çdo shqiptari, e deri më sot, ka arritur në mbi 200 milionë klikime.

Saktësisht, që prej shtatorit të vitit 2020 e deri më tani (Janar 2021) “Për’Puthen” ka arritur të grumbullojë plotë 202,008,006 klikime.

Një rekord ky, i cili ka si protagonist kryesorë konkurrentët, të cilët kanë zgjedhur që njohjet, që shpesh ndodhin jashtë kamerave, t’i realizojnë në sytë e vëmendjen e të gjithëve. Janë vajzat përballë djemve, njohjet e tyre, xhelozitë, intrigat disa nga arsyet që e kanë kthyer këtë reality dashurie në një ‘fenomen’. Ngjarjet e së cilës sa vinë dhe bëhen me interesante.

Pas suksesit të padiskutueshëm, programi dating më i ndjekur në Shqipëri vjen edhe të dielave mbrëma me ngjarje ekskluzive, të pathënat e javës , takimet, xhelozitë, diskutimet dhe të ftuar. Që prej datës 3 janar ka arritur të grumbullojë 9,514,367 klikime.

Disa nga puntatat kanë arritur në shifrën e 1 milion klikime për vetëm 1 episod. Me autorësinë e Olsa Muhametit dhe nën moderimin e Bora Zemanit, ky program tashmë ka hyrë në çdo familje shqiptare ne vend por edhe në diasporë. Opinionisti Arjan Konomi është rikthyer pas shumë viteve mungesë në ekran, sërish në Top Channel, me një rol kyç në analizimin e sjelljeve të protagonistëve.

Duket se personazhet tërësisht të zakonshëm, të cilët mund ti hasësh rëndomtë në përditshmëri, janë ata që e mbajnë publikun të mbërthyer jo vetëm përpara ekranit të televizorit, por dhe ekraneve të kompjuterëve apo telefonave, duke e bërë “Për’Puthen” një sensacion të vërtetë të “YouTube” dhe rrjeteve sociale.

Top Channel