Grupi muzikor amerikan, Green Day ka anuluar turneun e tyre në Azi të planifikuar për në mars dhe prill për shkak të pandemisë së koronavirusit të ri (COVID-19) dhe kufizimeve të udhëtimit.
“Me keqardhje njoftojmë se për shkak të shqetësimeve të vazhdueshme mbi COVID-19 dhe kufizimeve të udhëtimit, Green Day – Live në Hong Kong dhe Singapor, i planifikuar të mbahet përkatësisht më 19 mars të vitit 2021 dhe 1 prill të vitit 2021, do të anulohet”, njoftoi organizatori Lushington Entertainments në rrjetet sociale.
“Grupi dëshiron të falënderojë të gjithë tifozët për durimin dhe mirëkuptimin dhe shpresojmë që në të ardhmen të bëjmë shfaqjen në Hong Kong dhe Singapor”, theksohet më tej.
MMI Live dhe Live Nation, organizatorët e ngjarjeve në Filipine, Tajvan, Tajlandë dhe Korenë e Jugut, gjithashtu konfirmuan se koncertet janë anuluar. Green Day duhej të performonte në Manila më 13 mars, Taipei më 16 mars, Bangkok më 21 mars dhe Seul më 24 mars. Turneu u planifikua fillimisht për në mars të vitit të kaluar, por u shty përpara për shkak të pandemisë.
Njerëzit që kanë blerë bileta do të marrin rimbursim të plotë, theksuan organizatorët.
Top Channel
