Sulm horror në shtëpinë e zisë/ Nëntë të masakruar në hakmarrjen mes karteleve meksikane (Foto të rënda)

08/01/2021 18:14

Sulmues të karteleve të drogës kanë vrarë të paktën nëntë njerëz në një qytet të kontestuar mes trafikantëve në Meksikë.

Masakra e përgjakshme nisi mbreme vone kur sulmuesit në dy furgonë bastisën një shtëpi ku po mbahej zi, në qytezën  Celaya, në krahinën e luftuar të Guanajuato.

Imazhet e shpërndara në mediat sociale tregonin trupa të përgjakur të shpërndarë në rrugë pranë një arkivoli.

Mediat vendase raportonin se numri i viktimave të sulmit të së enjtes mund të arrijë deri në 13 pasi më shumë se 60 plumba ishin qëlluar.

Të shtëna automatiku dëgjohen në videot e shpërndara, që duket se janë regjistruar në skenën e vrasjes së shumëfishtë.

Njerëzit e shtëpisë besohet se po qëndronin zgjuar për funeralin e një burri që ishte vrarë një ditë më herët në qytet.

Në deklaratën e autoriteteve thuhej: “Sekretariati i Sigurisë Qytetare dënon çdo veprim që shkel paqen qytetare dhe shpreh keqardhje për vdekjet e civilëve”.

Nuk kishte ende raportime për përgjegjësinë e sulmit në qytezën në veriperëndim të kryeqytetit Mexico City.

Por Guanajuato është në qendër të një lufte mizore për territor mes bandave rivale të krimit të organizuar, për trafikun e leverdisshëm të drogave drejt SHBA.

Mijëra njerëz janë vrarë në këtë rajon që prej “rritjes” së bandes vendase Santa Rosa de Lima, e cila ka nisur përballjen me kartelin famëkeq Jalisco New Generation (CJNG) prej vitit 2017.

Autoritetet kanë kapur kreun e Santa Rosa në gusht të kësaj vere, por dhuna ka vazhduar të jetë jashtë kontrolli.

Karteli i ri është zgjeruar pas krijimit në një fermë të zonës, teksa nisi aktivitetin me vjedhje të karburantit nga linjat naftësjellëse të qeverisë dhe duke grabitur trenat e mallrave.

Por autoritetet kanë shtuar sigurinë në trenat dhe linjat e karburanteve në dy vitet e fundit dhe banda është kthyer te zhvatjet e pengmarrjet për të mbijetuar.

Ndërsa Jalisco New Generation është karteli më i dhunshëm i drogave në Meksikë, dhe po zgjeron territoret e tij në mënyrë agresive në të gjithë vendin me sulme brutale kundër rivalëve dhe forcave qeveritare.

Mbrëmjen e të martës pesë njerëz u vranë në qytezën e León në Guanajuato.

Sulmuesit erdhën në një apartament ku vranë në vend katër njerëz, dhe një viktimë e pestë vdiq në spital.

Në shtator kriminelët vranë 11 njerëz në një bar në Jaral del Progreso, pranë kufirit me shtetin meksikan të Michoacn.

Ndërsa më shumë se njëzet njerëz u vranë në korrik në një qendër të parregjistruar rehabilitimi nga drogat, në Irapuato.

Duke folur për vrasjet, presidenti vendit Andrés Manuel López Obrador ka thënë: “Situata me të cilën përballet Guanajuato është serioze. Lufta mes bandave është në shumicën e rasteve agresion territori mes tyre”.

FOTO GALERI
1/8
Sulmuesit në dy furgonë bastisën një shtëpi ku po mbahej zi, në qytezën Celaya

Top Channel