Sulmohet sërish me granatë objekti i komunës në Zveçan 29/11 08:54
Në reagimin e parë pas vendimit të Gjykatës Kushtetuese të Kosovës për Qeverinë e kryeministrit Avdullah Hoti, Bashkimi Evropian bëri thirrje për miratimin e buxhetit përpara zgjedhjeve të reja parlamentare. “Jemi në dijeni për vendimin e Gjykatës Kushtetuese dhe presim botimin e plotë të këtij vendimi.
Tani u takon institucioneve të Kosovës që t’i bëjnë hapat e ardhshëm përkatës, në përputhje me vendimin”, tha një zëdhënës i BE-së, duke shtuar se BE-ja “do të vazhdojë të angazhohet me të gjithë në Kosovë, për të promovuar agjendën e integrimeve evropiane dhe reformat e nevojshme”. “Është posaçërisht e rëndësishme që buxheti për vitin 2021 të miratohet dhe kalohet nga kjo përbërje e Kuvendit, sa më parë që të jetë e mundur”, tha zëdhënës i BE-së.
Projektligji për buxhetin e vitit 2021 është dërguar në Kuvendin e Kosovës nga ana e Qeverisë në largim dhe ndodhet në shqyrtim te Komisioni për buxhet dhe transfere. Në BE nuk deshën të përgjigjen në pyetjen se a presin që këto zhvillime të ndikojnë në rrjedhën e dialogut midis Kosovës dhe Serbisë, i cili ndërmjetësohet nga Bashkimi Evropian. Ata përsëritën se BE-ja do të vazhdojë të jetë e angazhuar me zyrtarët në Kosovë dhe Serbi në kuadër të dialogut dhe se ai dialog është i rëndësishëm për rrugën evropiane të të dyja vendeve.
Zyrtarët evropianë përsëritën thirrjet ndaj Kosovës për t’i respektuar dhe zbatuar të gjitha marrëveshjet e arritura deri më tash në dialog. Herën e fundit, kryeministri tashmë në detyrë i Kosovës, Avdullah Hoti, dhe presidenti i Serbisë, Aleksandar Vuçiq, janë takuar më 7 shtator.
Top Channel
