​Isa Mustafa: Do të dalim parti e parë

Qeveria e vendit tashmë është në detyrë pasi Gjykata Kushtetuese ka vlerësuar në vendimin e saj se vota e deputetit Etem Arifi për zgjedhjen e kabinetit Hoti në qershor të këtij viti ishte jo legjitime, duke konfirmuar kështu pretendimet e Lëvizjes Vetëvendosje për një gjë të tillë.

Ndërkohë që ushtruesja e detyrës së presidentes Vjosa Osmani ka nisur takimet konsultuese me partitë politike në vend për datën e zgjedhjeve, të cilat pritet të mbahen në fillim të vitit të ardhshëm, kryetari i LDK-së Isa Mustafa ka shfaqur besimin e tij se partia që ai drejton do të dalë e para në garën zgjedhore.

Ai duke iu drejtuar kryesisë dhe drejtuesve të degëve të LDK-së me rastin e 31-vjetorit të themelimit të LDK-së, tha se kjo parti gëzon përkrahjen e gjerë të qytetarëve, pasi që kanë ofertën më të mirë demokratike dhe euroatlantike për Kosovën.

“Dy herë me radhë LDK ua la udhëheqjen e qeverisë subjekteve tjera të cilat në zgjedhje i kishte mposhtur bindshëm. Kjo dëshmoi se LDK përpara pushtetit gjithmonë e ka vënë interesin e shtetit dhe të Kosovës. LDK i dha vendit dy presidentë dhe tre kryeministra, LDK që drejtoi nga qershori i këtij viti koalicionin qeverisës është e gatshme të sprovohet me subjektet e tjera në zgjedhjet e lira demokratike, sepse për LDK-në zëri i sovranit është më i rëndësishmi. Ne do të hyjmë në zgjedhje në fillim të vitit që vjen, me bindje të plotë se do të kemi përkrahjen e gjerë të qytetarëve, pasi kemi ofertën më të mirë demokratike dhe euroatlantike për vendin tonë se do të dalim parti e parë. LDK do të vazhdojë të punojë ngushtë me partitë simotra në kuadër të partive popullore evropiane për ta forcuar pozicionin ndërkombëtar të vendit tonë. LDK do të angazhohet me tërë kapacitetin e saj për integrimin e plotë të Republikës së Kosovës në Bashkimin Evropian, NATO dhe strukturat e tjera ndërkombëtare duke ruajtur dhe duke kultivuar me xhelozi miqësinë e përhershme dhe speciale me SHBA-në”, tha ai.

Mustafa tha se LDK do të vazhdojë ta ruajë dhe ta kultivojë frymën e saj tradicionale dhe shtet-ndërtuese.

“Pohoj besimplotë se LDK do të vazhdojë të ruaj dhe ta kultivojë me urtësi dhe me vendosmëri frymën e saj tradicionale, shtet-ndërtuese, frymën e paqes, dashurisë dhe humanizmit ashtu siç e kanë konceptuar që në fillimin e saj intelektualët, shkrimtarët, dhe atdhetarët më të mirë të këtij vendi të udhëhequr nga Gandi i Kosovës, prijësi, burrështetasi ynë i parë dr. Ibrahim Rugova. LDK e njeh urtinë dhe simbolikë e plisit të bardhë, por edhe botën e hapur dhe vizioni modern të të rinjve tanë. LDK ka qenë, është dhe do të mbetet përherë lidhja e Kosovës me familje e madhe të kombeve të lira në veçanti lidhja e Kosovës me vendet mike të demokracisë euro perëndimore”, tha ai. /KosovaPress/

Top Channel