Ekskluzive/ Komisionerët duan të bëhen gjyqtarë! Zbardhet kërkesa e 12 anëtarëve të KPK për Këshillin e Lartë Gjyqësor
24/11 19:50
Eurodeputetë nga grupet kryesore politike si dhe anëtarë të Komitetit të Politikës së Jashtme në Parlamentin Evropian i kanë bërë thirrje Këshillit Evropian për miratimin e kuadrit të negociatave me Shqipërinë dhe Maqedoninë e Veriut, në takimin e sotëm të Ministrave të Çështjeve Evropiane.
Në deklaratën në fjalë, mbi Shqipërinë dhe Maqedoninë e Veriut, të nënshkruar nga më shumë se 20 eurodeputetë, përfaqësues të grupeve politike nxisin të gjitha palët e përfshira në gjetjen e një zgjidhjeje për të siguruar që negociatat e pranimit të fillojnë para fundit të vitit.
Duke paralajmëruar se bllokimi aktual në bisedimet e pranimit me Maqedoninë e Veriut dhe Shqipërinë po rrezikon besueshmërinë e Bashkimit Evropian në Ballkanin Perëndimor, ata i bëjnë thirrje Bullgarisë dhe Maqedonisë së Veriut të gjejnë një kompromis mbi çështjet dypalëshe në pritje për të shmangur shtyrjen e procesit të pranimit më tej.
Mbi çështjen në fjalë ka reaguar edhe kreu i Grupit Parlamentar të PS-së, Taulant Balla, i cili citon një pjesë të deklaratës.
“Shqipëria e meriton të ecë përpara në rrugën e saj drejt anëtarësimit në BE”, vlerësojnë eurodeputetët, duke nënvizuar përpjekjet e gjithanshme në reforma, në mënyrë të veçantë në fushën e drejtësisë, gjatë viteve të fundit, sikurse vlerësohet edhe në vlerësimin e Komisionit Evropian.
Po kështu më tej në kërkesë shkruhet se:
“Bullgaria duhet të miratojë hapjen e konferencës ndërqeveritare (IGC) me Maqedoninë e Veriut sa më shpejt të jetë e mundur dhe në çdo rast në dhjetor, duke pranuar kështu përpjekjet e vendit në procesin e pranimit në BE. Maqedonia e Veriut, në rolin e saj si një vend i ardhshëm i pranimit, duhet gjithashtu të bëjë çdo përpjekje të mundshme nga ana e saj për të zgjidhur çështjet e pazgjidhura”.
Top Channel
