Të paktën 30 të vrarë nga një sulm me makinë bombë në Afganistan

Zyrtarët në Afganistan thonë se një sulm masiv me makinë bombë masiv në një bazë ushtarake në provincën lindore Ghazni shkaktoi vdekjen e të paktën 30 pjesëtarëve të forcës së sigurisë.

Baz Mohammad Hemat, kreu i departamentit të shëndetit publik të provincës i tha Zërit të Amerikës se shpërthimi plagosi të paktën 24 anëtarë të personelit. Baza e ushtrisë në periferi të kryeqytetit të provincës, e quajtur gjithashtu Ghazni, drejtohej nga forcat speciale afgane, thanë dëshmitarët për Zërin e Amerikës.

Ndërkohë, një tjetër makinë bombë në provincën jugore të Zabulit vrau tre vetë dhe plagosi më shumë se 20, thanë zyrtarët për Zërin e Amerikës. Kreu i këshillit të provincës, Atta Jan Haqbayan, që me sa duket ishte objekti i sulmit dhe roja i tij i sigurisë ishin midis të plagosurve.

Askush nuk e ka marrë përgjegjësinë për dy sulmet që vijnë ndërsa bisedimet e paqes midis kryengritësve talebanë dhe përfaqësuesve të qeverisë afgane kanë ngecur për javë të tëra. Të ashtuquajturat negociata ndër afgane, të ndërmjetësuara nga Shtetet e Bashkuara, janë duke u mbajtur në Katar. Të dy palët luftarake afgane fajësojnë njëra-tjetrën për ngecjen.

Dhuna në Afganistan ka shënuar rritje të ndjeshme javët e fundit, me shumë forca të sigurisë dhe civilë të vrarë vetëm në muajin nëntor./VOA/

Top Channel