Pandemia në Evropë, vendet kthejnë masat kufizuese

Në Francë, ministri i shëndetësisë, Oliver Veran, tha se donte të evitonte një tjetër izolim dhe i kërkoi njerëzve të mos ulin vigjilencën. Ne- tha ai – nuk po kalojmë një valë të dytë të koronavirusit por duhet të respektojmë masat. Autoritetet franceze raportuan 14 viktima nga virusi të martën, një rritje e ndjeshme kjo krahasuar me një javë më parë. Ndërsa në Rumani, autoritetet planifikojnë ti bëjnë maskat të detyrueshme në ambjentet e shumëfrekuentuara të hapura dhe të mbyllë baret pas orës 23. Numrat edhe atje janë rritur kohët e fundit, me më shumë se 1 mijë çdo ditë të javës së kaluar.

Në Itali, senati votoi për zgjatjen e gjendjes së emergjencës. Kryeministri Giuseppe Conte tha se infektimet po rriteshin edhe në vendet e tjera fqinje, përfshirë Francën, Spanjën dhe në Ballkan, dhe kërkoi për më shumë vigjilencë në mënyrë që të evitohej një rikthim i virusit, i frikshëm si më parë. Shefi i agjencisë gjermane të shëndetit publik po ashtu ka shprehur shqetësim nga rritja e infeksioneve. Lothar Wieler, shef i institutit Robert Koch, tha se gjermanët janë bërë neglizhentë dhe i kërkoi njerëzve të mbanin maska dhe të respektonin distancimin social dhe rregullat e higjienës.

Gjermania e menaxhoi mirë shpërthimin fillestar por vetëm javën e shkuar ka regjistruar 3611 infektime të reja. Greqia, që po ashtu ia doli mbanë mirë në muajt e parë të pandemisë, tha se do ti bënte maskat të detyrueshme sërish në dyqane dhe shërbimet publike pas një rritjeje të kohëve të fundit të rasteve.

Top Channel