Një polic në Korçë është plagosur me mjet prerës, saktësisht thikë. Korrespondentët e Top Channel-it bëjnë me dijeni se bëhet fjalë për efektivin Spartak Zotka.
Mësohet se shkak i plagosjes ka qenë një gjobë e vendosur prej efektivit ndaj autorit të ngjarjes.
Zotka, punonjës i rendit është goditur me thikë në pjesën e fytyrës, teksa ngjarja në fjalë ka ndodhur në qendër të Korçës.
Njoftimi i policisë:
Mesditën e sotme, pranë “Kullës Red” në Korçë, shtetasi I. F., 48 vjeç, dyshohet se për shkak të detyrës, ka plagosur me mjet prerës punonjësin e Komisariatit të Policisë Korçë S. Z., i cili ka qenë jashtë shërbimit dhe më pas është larguar nga vendngjarja.
Falë reagimit të shpejtë të Policisë dhe mirëorganizimit të veprimeve u bë e mundur kapja dhe arrestimi në flagrancë i autorit të dyshuar të ngjarjes, i cili aktualisht ndodhet në ambientet e Komisariatit. Ngjarja dyshohet të ketë ndodhur për shkak të detyrës, pasi 48-vjeçari, para disa ditësh është konstatuar duke lëvizur si këmbësor pa autorizimin përkatës dhe është ndëshkuar me masë administrative, nga punonjësi i policisë. Në cilësinë e provës materiale iu gjet e sekuestrua një mjet prerës (thikë).
Punonjësi i policisë S. Z., aktualisht po merr mjekim në Spitalin e Korçës, ku ndodhet jashtë rrezikut për jetën.
Top Channel
