Pas pamjeve dramatike të reportazhit të fundit të BBC që zbuloi se shumë prej fëmijëve të refugjatëve të cilët jetojnë në kampin famëkeq të Morias në ishullin grek të Lesvos duan të vrasin veten, edhe televizioni shtetëror zvicerian pasqyron në një kronikë të re televizive gjendjen tragjike dhe kushtet çnjerëzore në kampin e ishullit të Samos.
Ndërsa është ndërtuar për të mbajtur vetëm 680 vetë, numërohen mbi 8000 refugjatë dhe emigrantë, fakt që ka bërë që tashmë banorët e ishullit të mos t’i ndihmojnë më ata dhe të kërkojnë prej organeve lokale largimin e tyre.
“Realisht ky kamp është një qytet i dytë. Kur në 2015 filloi kriza me Sirianet, banoret ndihmonin, por tashmë gjërat kanë ndryshuar pasi është zvogëluar numri i Sirianeve dhe është rritur numri i atyre që vijnë nga Afrika apo vendeve ku nuk ka lufte”- tha Georgios Dionisiou zv.kryetar bashkie.
Ashtu si edhe në kampin e Morias që mban 7 here më tepër refugjatë se kapaciteti, në kushte tepër të rrezikshme për shëndetin e tyre, edhe në ishullin Samo ka mungesa të jashtëzakonshme sidomos për fëmijët e vegjël.
Sipas të dhënëva nga OKB numri i refugjatëve që kanë hyrë në Greqi këtë vit ka shkuar në rreth 69000 vetë, ndërsa në Itali kanë hyrë vetëm 1500.
“Sezoni turistik në Samo zakonisht fillon në maj dhe mbaron në fund të shtatorit dhe fillim tetorit. Vitet e fundit shohim vizitorët të fillojne të shtohen vetëm në korrik. Kjo nënkupton 3 muaj të humbur para dimrit”- tha Manolis Giokarinis banor i ishullit Samo.
Ajo që tronditi opinionin publik në reportazhet nga kampet e tmerrit ishte fakti se dëshira për vetëvrasje shihet në shumicën e mbi 7000 fëmijëve të cilët kanë përjetuar tmerret e konflikteve të armatosura nga zonat ku vijnë si Siria, Afganistani apo vende të tjera.
Qeveria greke është tepër e shqetësuar nga përshkallëzimi i krizës migratore, ndërkohë që ndodhet në kulmin e konflikteve me Turqinë sa i përket pretendimeve të Ankarasë për ZEE në juglindje të Kretës.
Top Channel
