Vitrina e Librit/ Dëmtuar gjatë rrugës

Në një zyrë të vërtetë të pushtetit, atje ku ndihet si frikë deri në kockë hija e rëndë e shtetit, nëna ime ka shkelur për herë të parë kur ishte njëzet e katër vjeçe. Ajo kishte tashmë një fëmijë për gjiri. Një djalë. Mua, që kam marrë sot përsipër të shkruaj në njëfarë mënyre romanin e jetës së saj. Është një histori, të cilën ajo e ka mbajtur brenda kokës së vet si një tumor (fjalët e saj) për tridhjetë vjet. Unë po e shkruaj me dëshirën e saj, madje me urdhrin e saj, por krejt me stilin tim; liri që ajo vetë ma kishte dhënë të plotë qysh në krye të herës, e bindur se kështu përmbushej më mirë pikërisht qëllimi i saj.

Nëna nuk kishte njeri për  t’ia besuar frikën e vet. Një frikë e tillë përbënte në vetvete një akt politik subversiv ndaj regjimit, penalisht të dënueshëm rëndë”. Nëna e Besnik Mustafajt, vjen në roman si një grua e heshtur, e ndrojtur e thjeshtë dhe duarartë. Është një grua e veriut të largët që në fundin e viteve 1950 vihet për herë të parë në një situatë të re- e thirrur nga zyrat e shtetit për një sekret madhor të cilin nuk mund ta ndajë me askënd. Prej asaj kohe ajo i merr zët zyrat, pushtetin, funksionarët dhe njihet me frikën e (pa)arsyeshme të këtyre fuqive që krejt papritur i japin një liri që mund ta keqpërdornin. Ky roman i Besnik Mustafajt është shkruar me kërkesën e saj, ajo ia ka besuar të birit gjithë dhembjet, ndonëse kur ajo vuante ai ishte veçse një kërthi në djep. “Dëmtuar gjatë rrugës. Roman me fund të lumtur sjell megjithatë vetminë e njeriut në shoqëri, prej se gjendet në jetën e tij edhe frika se do të dëmtojë jetët e njerëzve që do”. Libri i botuar nga “Toena” sjell jetën e një gruaje, duke përfaqësuar qindrat si ajo, me frikë për të nesërmen dhe djepin që tundnin.

Të dhëna për librin

Autor: Besnik Mustafaj

Shtëpia Botuese: Botimet Toena

Viti i botimit: 2019

Cmimi: 1000 Lekë

Top Channel