U sulmua seksualisht nga një burrë, 12-vjeçarja i dërgon mesazhin rrëqethës shoqes: Nuk ia them dot mamit, ai më… 23/04 13:06
Një imitues i Kim Jong-ut është dëbuar nga Vietnami, përpara takimit të udheheqësit të vërtetë të Koresë së Veriut me Presidentin amerikan Trump në Hanoi këtë javë.
Houard X, nga Hong Kongu organizoi një samit të rremë me imituesin e Trump, Russell Uajt javën e kaluar. Të dy u ndaluan për t’u marrë në pyetje nga policia vietnameze që i tha të ndërpresin talljet politike.
Hauard X deklaroi se zyrtarët i thanë që viza e tij është e pavlefshme, por nuk janë dhënë shpjegime të mëtejshme.
“Satira është një armë e fuqishme kundër çdo diktature. Ata janë frikësuar nga disa djem që duken si personazhet e vërtetë”, u tha gazetarëve Hauard X, i cili kishte veshur një kostum të zi dhe syze të trasha të zeza në stilin e Kim.
Ai dhe Uajt morën pjesë në një “samit” në kryeqytetin e Vietnamit, Hanoi, duke u thënë gazetarëve se kanë tentuar të zgjidhin çështjen bërthamore të Koresë së Veriut.
“Ne jemi duke punuar drejt paqes. Nëpërmjet negociatave, me dialog, ne duam të ndihmojmë natyrisht Korenë e Veriut”, u tha gazetarëve në atë kohë Uajt, i veshur si Donald Trump.
“Shpresojmë që ai të heqë dorë nga të gjitha raketat bërthamore dhe të shtojë bashkëpunimin tregtar”, tha ai.
Të dy u arrestuan nga policia ndërsa jepnin një intervistë për një kanal televiziv.
Policia vietnameze u tha që të ndalonin imitimet e tyre dhe se duhet të qarkullonin vetëm rreth qytetit me një itinerar të miratuar më parë e të shoqëruar, raporton agjecia e lajmeve AFP.
“Arsyeja e vërtetë është se unë kam lindur me një fytyre që ngjason me atë të Kim Jong-un, ky është krimi i vërtetë”, tha Hauard X. Ai shtoi se po dëbohej, sepse udhëheqësi i Koresë së Veriut nuk kishte sens humori.
Në Lojërat Olimpike Dimërore 2018 në Korenë e Jugut ai po ashtu u përzu pas vallëzimit përpara skuadrës së tifozëve të Koresë së Veriut.
Presidenti Trump dhe Kim Jong-un do të takohen në Hanoi më 27-28 shkurt për bisedimet që pritet të përqëndrohen te dhënia fund e programit bërthamor të Penianit.
Samiti i tyre i parë në Singapor, nuk pati shumë rezultate. Palët thanë se ishin të angazhuar për denuklearizimin, por nuk u tha se si kjo do të kryhej ose do të verifikohej.
Top Channel
