Debat për Boden. PD: Nuk është i yni, por kandidat i Ramës

“Çdo lloj veprimi që do të çojë në kapjen e Bankës së Shqipërisë në duart e një force të vetme politike, asaj që qeveris, thyen drejtpërdrejt Kushtetutën. Tani ju mendoni se jeni të zgjuar dhe thoni se e bëni në këtë formë, i çoni të trija bashkë. Hapni legjislacionin për çështje të tjera. Një kandidat, 28 firma; në mënyrë që të fragmentohet grupi dhe të mos ketë kontroll nga një dorë e vetme”, tha Oerd Bylykbashi.

“Nëse ju do të kishit përzgjedhur një nga ato kandidatura që kanë aplikuar dhe kanë shfaqur interes, sigurisht që mund ta kishit sjellë. Nuk e keni sjellë zotëri. E drejta e grupit parlamentar socialist për të mbështetur kandidatura na takon dhe nuk e negociojmë aspak me ju”, tha Taulant Balla.

Një merak më vete, demokratët e kishin për Ridvan Boden, ish-ministrin e tyre të Financave në kohën e dy mandateve të qeverisë “Berisha”, të cilin tashmë e shohin me sy tjetër.

“Qëndrimi zyrtar i PD është bërë i qartë nga kryetari i saj. Ne nuk pranojmë që kandidaturat që propozon Partia Demokratike t’i propozojë mazhoranca. Ridvan Bode nuk është përfaqësues i PD-së, por është i Edi Ramës”, tha Edmond Spaho.

“Nuk mund të vijë dita që Oerd Bylykbashi t’i bëjë gjyqin Ridvan Bodes këtu në këtë seancë. Të thotë se e kemi kapur ne Ridvan Boden, kur ai ka qenë ministër në dy qeverisje të ndryshme të PD-së, edhe në Saliun e parë, edhe në Saliun e dytë. Po ashtu, edhe zonja Suela Popa Tavo është sigurisht një kandidaturë serioze, e cila në asnjë moment nuk mund të konsiderohet si një përfaqësuese e PS-së”, tha Taulant Balla.

Përballë pikëpyetjeve edhe mes të majtëve mbi propozimin e Bodes, kryeministri Rama ka shpjeguar se e ka zgjedhur atë për shkak të aftësive profesionale, me qëllim për t’i shërbyer Bankës së Shqipërisë.

Top Channel