Sllovakia nuk do të mbështesë paktin e Kombeve të Bashkuara për trajtimin e emigrantëve në mbarë botën. Kështu tha kryeministri Peter Pellegrini të dielën, pas samitit të Bashkimit Europian.

Pakti Global për Emigracion të Sigurt dhe të Rregullt është miratuar në korrik nga të gjitha 193 vendet anëtare të Bashkimit Sovjetik, përveç Shteteve të Bashkuara të Amerikës, të cilat u tërhoqën vitin e kaluar, dhe do të ratifikohet zyrtarisht në dhjetor.

Pakti u krijua pas fluksit më të madh të emigrantëve në Europë që nga Lufta e Dytë Botërore, shumë prej të cilëve largohen nga vendet e tyre për shkak të konflikteve, por edhe nga varfëria në Lindjen e Mesme, Afrikë dhe më gjerë.

“Sllovakia nuk do ta mbështesë këtë pakt të Kombeve të Bashkuara në asnjë rrethanë dhe nuk do të pajtohet me të,” u tha Pellegrini gazetarëve në Bruksel pas samitit ku liderët e BE miratuan marrëveshjen për tërheqjen e Britanisë nga blloku.

Një refuzim i Sllovakisë për paktin e migracionit mund të çojë në një tronditje të qeverisë së Pellegrinit, duke pasur parasysh se Ministri i Jashtëm Miroslav Lajçak ka kërcënuar të japë dorëheqjen nëse qeveria del kundër paktit për emigrantët.

Lajçak ishte kryetar i Asamblesë së Përgjithshme të Kombeve të Bashkuara kur u miratua pakti i emigracionit.

Pellegrini u shpreh se ai beson se Lajçak do të qëndrojë në qeveri edhe pse Sllovakia e refuzon paktin.

“Unë do të bëj gjithçka që mundem për ta mbajtur atë në vendin e tij”, tha kryeministri sllovak.

Top Channel