Mbërritjet e fundit të emigrantëve në Greqi ka çuar në një rëndim të situatës dhe një mbipopullim të qendrave të pritjes në ishuj, ku 1.800 fëmijë të pashoqëruar jetojnë në kushte të rënda.
Alarmi është dhënë nga UNICEF, sipas të cilit vetëm një e treta e fëmijëve merr strehim dhe asistencën e duhur.
Agjencia e Kombeve të Bashkuara bën thirrje për politika dhe reforma për mirëmbajtjen e të miturve të cënuar, të cilët shpesh herë detyrohen të jetojnë rrugëve, në një kohë kur dimri po afron.
Sipas UNICEF, në shtator të këtij viti në Greqi janë regjistruar mbi 5.700 ardhje të reja, krahasuar me 3.080 që ishin në shtator të vitit 2016.
Si pasojë e kësaj situate, disa qendra pritjeje për të miturit po strehojnë dyfishin e numrit të parashikuar, duke kompromentuar kështu sigurinë dhe mirëqënien e të miturve.
Në veçanti sinjalizohet cënueshmëria e fëmijëve sidomos gjatë orëve të natës, ku ata mund të bien pre e rrëmbimeve dhe dhunimeve në mungesë të garantimit të sigurisë.
Top Channel
