Panairi i mjaltit në Librazhd, risi për 150 biznese

Panairi në qendër të tij kishte mjaltin, prodhimin kryesor dhe më të njohur në Librazhd, ku më shumë se 400 bletërritës merren me prodhimin e tij. E pasur me pyje dhe kullota të shumta, por edhe me pyje gështenjash, zona e Librazhdit cilësohet si kryesorja për prodhimin e mjaltit cilësor në vend.

Në panair morën pjesë më shumë se 150 biznese, ndërsa Bashkia e Librazhdit synon ta kthejë në traditë atë që tani e tutje do të cilësohet si “Festa e Mjaltit”.

“Kjo është një iniciativë e parë dhe jam i bindur se do ta kthejmë në traditë çdo vit. Në këtë periudhë do të afrojmë më shumë. Sot janë 150 biznese që kanë sjellë produktet e tyre për t’i promovuar”, u shpreh Kastriot Gurra, kryetar i bashkisë Librazhd.
Edhe pse me shumë pak traditë në këtë drejtim kuzhinieret pranojnë se mjalti gjithnjë e më shumë po gjen përdorim në gatime të ndryshme.

“Kohët e fundit është ndërthurur kuzhina e athtë me të ëmbël. Kemi ndërthurje të kuzhinës, mishit me mjaltin, apo me produkte të tjera. Zona e Librazhdit ka më shumë produkte bio se çdo zonë tjetër e Shqipërisë”, tha Naim Bashmili.

Festa e Mjaltit mblodhi në qendër të Librazhdit qindra njerëz që jo vetëm u njohën me produktet tërësisht bio, por edhe me traditat dhe kulturën e zonës.

Top Channel