Uashington, Tillerson pret Lavrov në Departamentin e Shtetit

10/05/2017 00:00

Ministri i Jashtëm rus, Serghiei Lavrov është pritur nga homologu amerikan Rex Tillerson në selinë e Departamentit të Shtetit.

Takimi kokë më kokë i ka paraprirë atij që shefi i diplomacisë ruse do të zhvillojë me presidentin Donald Trump në Shtëpinë e Bardhë.

Bëhet fjalë për takimin e parë të presidentit amerikan me një përgjegjës të lartë të shtetit rus.

Në axhendë, sipas mediave amerikane, pritet të jenë çështje si Siria, Ukraina, lufta kundër terrorizmit, si dhe mundësia për një takim mes Trump dhe Putin.

Vizita e Lavrov në Shtetet e Bashkuara është e para që prej gushtit të vitit 2013 dhe ndodh një ditë nga shkarkimi nga detyra i drejtorit të FBI-së, James Comey, që po hetonte mbi të ashtuquajturin “Russia-Gate”.

Lidhur me këtë çështje, lideri i demokratëve në Senat, Charles Schumer ka kërkuar që hetimet t’i besohen një prokurori të posaçëm.

Por republikanët kanë ngritur menjëherë një mur kundër kësaj kërkese dhe çdo hetimi të ri për ndërhyrjet ruse në zgjedhjet amerikane.

Lideri i mazhorancës në Senat, Mitch McConnell ka deklaruar se republikanët nuk do të mbështesin asnjë kërkesë të këtij lloji, duke sqaruar se një gjë e tillë vetëm sa do të pengonte hetimet që janë në zhvillim e sipër.

Top Channel