Dy ushtarë turq kanë mbetur të vrarë nga përplasjet me militantë të grupit të të ashtuquajturit Shtet Islamik në Siri. Lajmi konfirmohet nga ushtria turke, e cila shton gjithashtu se 5 të tjerë janë plagosur nga një sulm me raketë ndaj tankeve turke.
Viktimat në radhët e ushtrisë turke besohet të jenë të parat, që prej nisjes së operacioneve brenda territorit sirian nga ana e Turqisë. Ndërkohë, dy luftëtarë nga “Ushtria e Lirë Siriane” janë vrarë, ndërsa dy të tjerë janë plagosur nga i njëjti sulm.
“Dy prej ushtarakëve tanë heronj janë martirizuar, ndërsa 5 të tjerë janë plagosur pas një sulmi me raketë ndaj dy tankeve tona, nga elementë terroristë të ‘Daesh’-it”, thuhet në komunikatën e ushtrisë turke, ndërsa me “Daesh” i referohen ndryshe Shtetit Islamik.
Sulmi me raketë u krye pranë fshatit al-Waqf, thuhet më tej në deklaratën e ushtrisë.
Rebelët sirianë, të mbështetur nga Turqia, kanë bërë të ditur se kanë shtënë në duart e tyre një numër fshatrash nga militantët xhihadistë, që kur Turqia nisi operacionin e saj të koduar me emrin “Mburoja e Eufratit”. Rebelët kanë marrë gjithashtu edhe kontrollin e qytetit të rëndësishëm kufitar të Jarabulusit.
Të dielën, Turqia tha se luftëtarët e ISIS-it ishin zmbrapsur nga pozicionet e fundit që mbanin përgjatë kufirit turko-sirian. Forcat turke kanë shënjestruar ISIS-in brenda territorit sirian, por kanë sulmuar edhe luftëtarët kurdë në të njëjtin rajon.
Përndjekja e milicive kurdë “YPG” ka shkaktuar kritika nga Uashingtoni, i cili i konsideron kurdët si një prej forcave më efektive në betejën kundër Shtetit Islamik.
Top Channel
