Debati për gratë, Rama: Jam feminist. Vokshi: Të martën protestë

Albana Vokshi tha se mendimi i byrosë u morr me urdhër të Edi Ramës, të cilin e akuzoi veçanërisht për marrëdhëniet me gratë, duke iu referuar edhe fjalorit të përdorur sipas saj nga kryeministri në seancën e së enjtes.

“Edi Rama, në këtë mënyrë, nuk ka dhunuar vetëm dy kundërshtare të tij politike, por çdo grua shqiptare, çdo socialiste, çdo vajzë e nënë, me parti, pa parti. Çdo grua që sjell jetë, çdo grua që zoti e ka krijuar. Një akt i papranueshëm tradicionalisht, i papranueshëm aq më shumë sot në vitin 2016. Edi Rama, u tall e fyeu çdo grua e vajzë që i doli përpara në rrugën e tij. I shtyu drejt vetvrasjes nëna, gra dhe motra që s’përballonin dot arrogancën e pushtetit të tij.”, deklaroi Vokshi.

Kryeministri iu pergjigj demokrateve nga forumi I grave socialiste

“Unë jam feminist, se jam socialist. Por, duan s’duan, jam dhe artist. E të jesh socialist dhe të jesh dhe artist dhe të mos jesh i emocionuar kur ke përpara gra dhe vajza, është e pamundur. E nga ana tjetër unë nuk mund të pranoj dot asnjë leksion nga ata që kur ishin në qeveri e kishin qeverinë një çetë me burra dhe mbanin një grua të vetme për hajmali. E aq më tepër pastaj të marrësh leksion nga burra që i abuzojnë gratë për t’i bërë viktima, siç abuzuan me atë të shkretën që unë i thashë “motër”, ata thonë i tha “mostër” se duan ta përdorin viktimën për të luftuar me mua dhe me ne.“, tha Rama.

Edi Rama solli statistikat në ndihmë. Qeveria e tij është me më shumë gra, përfaqësimi gjinor në këshillat bashkiake është i barabartë, dhe kongresi do të jetë gjithashtu i përbërë nga gra dhe burra në perqindje të barabartë tha kreu i socialistëve.

“Por, sa më shumë të na luftojnë, aq më shumë na forcojnë. Saliu thotë “e kam dëgjuar nga Enver Hoxha”, por Enver Hoxha e kishte dëgjuar nga populli, kështu që unë për vete nga populli e kam marrë: Qentë le të lehin, karvani do eci përpara”, vijoi Rama.

Top Channel