Kandidati republikan në garën për presidencën në SHBA, Donald Trump, mund të mos ketë simpatinë e pjesës më të madhe të ligjvënësve në parlamentin britanik, por pavarësisht kësaj ai do të lejohet që të hyjë në vend.
Parlamentarët britanikë shprehën mospëlqimin e tyre ndaj politikanit amerikan gjatë një debati që zgjati 3 orë, e që u zhvillua pasi 574 mijë njerëz nënshkruan një peticion për t’i ndaluar Trumpit hyrjen në ishull.
Në peticion thuhej se Britania e Madhe u kishte ndaluar hyrjen shumë individëve që me fjalimet e tyre nxisin urrejtje dhe se rregullat duhet të zbatohen në mënyrë të njëjtë si tek të pasurit, ashtu edhe tek të varfërit.
E megjithatë, debati përfundoi pa një votim dhe u vendos se vetëm ministrja e Brendshme, Theresa May mund të lëshojë një urdhër për të penguar hyrjen e dikujt në vend. Por gjithsesi, politikanët britanikë e bënë të qartë se nuk i pranojnë pikëpamjet kontroverse të Trumpit, veçanërisht premtimin e tij për t’u ndaluar hyrjen myslimanëve në SHBA apo sugjerimet se pjesa më e madhe e emigrantëve meksikanë janë përdhunues apo trafikantë droge.
Ligjvënësit përdorën epitete nga më të rëndat për Trumpin, duke e cilësuar atë një palaço apo të krisur.
“Nuk duhet të kesh një sferë magjike për të kuptuar se personi për të cilin flasim mund të jetë një biznesmen i suksesshëm, por ai është gjithashtu një palaço, i cili ka aftësinë e rrezikshme për të thënë gjërat më të pahijshme apo të pandjeshme për të tërhequr vëmendjen”, tha deputeti Gavin Robinson.
“Komentet e tij lidhur me myslimanët janë të gabuara. Politika e tij për të mbyllur kufijtë nëse zgjidhet president është një lajthitje dhe nëse ai takon një ose dy nga zgjedhësit e mi në ndonjë prej lokaleve të shumta në zonën time elektorale, ata mund t’i thonë se është një budalla që po e trajton çështjen në këtë mënyrë”, u shpreh Victoria Atkins.
Në fund të debatit, Zyra për Punët e Brendshme tha se SHBA është një prej aleatëve më të rëndësishëm të Britanisë së Madhe dhe se është në interesin e vendit të kenë dialog me të gjithë kandidatët presidencialë.
Trump nga ana e tij, ka kërcënuar të anulojë investimet prej 700 milionë paundësh për fusha golfi në Skoci, nëse nuk do të lejohet të hyjë në vend.
Top Channel
