Deputetët opozitarë të arrestuar vizitohen nga KMDLNJ

Deputetët në fjalë, gjatë vizitës së KMDLNJ-së kanë pohuar se nuk ka pasur vendim për ndalimin e tyre, por një gjë e tillë u është dhënë në stacionin qendror policor. Deputetët kanë pohuar gjithashtu se, Policia e Kosovës ka pasur sjellje korrekte gjatë arrestimit dhe transportit, duke shtuar se janë të vetëdijshëm për kushtet e vështira që ka qendra e ndalimit, si dhe kanë vlerësuar sjelljet korrekte të stafit.

Ndërsa gjatë së martës, deputetët opozitarë – të ndaluar një ditë më parë, – janë dërguar në Gjykatën Themelore në Prishtinë, ku deputetit të Vetëvendosjes, Faton Topalli, i është caktuar masa e paraburgimit deri më datë 7 janar. Kjo masë iu caktua pas shkeljes së masës së “arrestit shtëpiak”, duke u paraqitur në Kuvendin e Kosovës.

Arrestimi i deputetëve opozitarë është cilësuar si shkelje kushtetuese nga Lëvizja Vetëvendosje.

“Arrestimet e deputetëve dhe aktivistëve, që kanë vazhduar edhe dje, janë në kundërshtim me çdo rregullore të Kuvendit dhe Kushtetutës së Kosovës. Ajo që deputetët e opozitës kanë bërë dje është në përputhje të plotë me betimin e tyre dhe detyrat e tyre, në mbrojtje të sovranitetit të Republikës dhe në kundërshtim të dy marrëveshjeve të dëmshme”, tha Driton Çaushi, nënkryetar i LVV-së.

Të hënën, në dalje të Kuvendit të Kosovës u arrestuan deputetët e Vetëvendosjes, Aida Dërguti, Glauk Konjufca, Besa Baftiu, Faton Topalli dhe Fisnik Ismajli, ndërsa nga AAK: Pal Lekaj, Time Kadriaj dhe Teuta Haxhiu. Këto arrestime e çojnë në 13 numrin e deputetëve opozitarë të arrestuar në Kosovë, muajt e fundit.

Top Channel