Pallatet që rrezikojnë shembjen, në kërkim administratori i firmës

Banorët janë larguar që aty në pritje të një urdhri të dytë. Askush nuk lejohet të kalojë në rrugë për shkak se inxhinierët mendojnë se edhe pesha trupore e një njeriu të vetëm mund të shkaktojë shembje të tjera dheu.

Ndërkohë që policia vazhon të kërkojë administratorin e firmës që shkaktoi shembjen e dheut, Bujar Hasen, ish-prefekt. Të dhënat policore nuk tregojnë se ai është larguar nga vendi, por as në banesën e tij private nuk gjendet.

Hetimet paraprake dalin në përfundim se është gërmuar më tepër nga normat e caktuara dhe sa ishte parashikuar në projektin fillestar.

Nisur edhe nga dëshmitë e punëtorëve dhe të inxhinierëve të shoqëruar të shtunën në mesditë, firma po gërmonte më thellë dhe për këtë arsye dyshimet për fajësinë shkojnë tek administratori.

Kryetari i Bashkisë Tiranë në një dalje publike tha se janë marrë masa për këtë rast dhe premtoi një zgjidhje të shpejtë.

Herët të shtunën, të 34 familjet u evakuuan dhe ndalohen të banojnë në dy pallatet që rrezikojnë shembjen. Ende nuk dihet se kur do nisin punimet për rehabilitimin e segmentit rrugor të shembur.

“Ai është një problem që po menaxhohet nga Emergjencat Civile dhe prefekti. Ne sigurisht që jemi prezent aty me Inspektoriatin e Mbrojtjes së Territorit. Në fakt përveç atij pallati, e gjithë zona ka nevojë për një studim. Janë leje që janë dhënë nga Komuna Farkë në katër vitet e fundit dhe një pjesë e madhe janë shndërruar në gropa pa pasur investimin e nevojshëm. Ne diskutim me prefektin dhe me Emergjencat Civile po presim që të prodhojmë një projekt se si mund të bëjmë rehabilitimin e asaj rruge. Ajo leje nuk do të zbatohet sa të jem unë në krye të bashkisë”, tha Erion Veliaj.

Top Channel