Të vdesësh në rrugë

Janë rastet ekstreme kur të pastrehët humbin jetën dhe përpjekja e tyre për të mbijetuar merr fund.

Atëherë kur ngrica dhe i ftohti u ndal frymën, teksa flejnë në rrugët e ftohta. Tre ditë më parë, një burrë rreth të 60-ave humbi jetën në “Rrugën e Elbasanit”, në Tiranë. Për të nuk u tha asgjë më tepër përveç faktit se temperaturat e ulta dyshohen t’i kenë marrë jetën.

Ky nuk është rasti i parë e i vetëm i ndodhur brenda këtyre pak javëve. Roja i një lokali u nda nga jeta ditën e parë të vitit 2015, duke pësuar një infarkt nga i ftohti në Tiranë. Në momentin e ngjarjes ai po qëndronte ulur në një karrige, kur temperaturat shënonin nën 0 gradë celcius.

Këto janë ngjarje të paralajmëruara, të cilat përsëriten vit pas viti. Një ndër precedentët më të rëndë vijon të mbetet ai i 87-vjeçares Sofi Qendro nga Durrësi, e cila humbi jetën në tetor të 2013-s, teksa flinte në stolat e lulishtes përpara Bashkisë. Për kohë me radhë ajo dhe nipi i saj kërkuan ndihmë që t’u gjendej një zgjidhje. Por, me sa duket askush nuk i mori seriozisht. Pas disa muajsh apel, e moshuara ndërroi jetë në spitalin e qytetit, pasi nuk i mbijetoi të ftohtit.

E ndërsa këto janë vetëm rastet më të fundit të të pastrehëve që neglizhohen e humbin jetën pa bërë shumë zhurmë, ndër vite kjo kategori vuan pasojat e të ftohtit dhe mungesës së vëmendjes së të gjithëve.

Top Channel