Inflacioni në dhjetor zbret në 0.7%, më e ulta në 2 vjet. Edhe BSH kapet në befasi

Një muaj më parë, pra në nëntor, norma e inflacionit ishte 1.7 për qind dhe rënia e shpejtë e treguesit duket se ka qenë e papritur edhe për vetë Bankën e Shqipërisë, institucionin që përgjigjet për stabilitetin e çmimeve në vend.

Nga shkurti i vitit të kaluar, inflacioni ka qenë gjithmonë nën objektivin ligjor prej dy përqind të Bankës së Shqipërisë, duke reflektuar dobësinë e ekonomisë dhe kërkesës për mallra në treg. Burime nga Banka thanë për Top Channel se pritshmëritë e tyre ishin që treguesi të rritej në dhjetor, por kjo nuk është vërtetuar.

Edhe pse e mohojnë rrezikun, që Shqipëria të rrëshqasë në deflacion ashtu si eurozona, ekspertët e Bankës thonë se rënia e papritur e inflacionit mund të jetë një sinjal jopozitiv për ekonominë. Kjo, edhe për një arsye tjetër, që lidhet me shkaqet e kësaj rënieje.

Përtej çmimit të karburanteve, ndikimin më të madh në uljen e inflacionit e dhanë çmimet e artikujve ushqimorë. Më konkretisht, çmimet e ushqimeve në dhjetor ishin vetëm 0.4 për qind më të larta se një vit më parë. Ky është një trend i pazakontë për fundin e vitit, ku ushqimet tentojnë të shtrenjtohen, për shkak edhe të kërkesës më të lartë që shoqëron periudhën e festave.

Pikërisht shmangia nga sezonaliteti i përvitshëm, duket se është edhe shqetësimi kryesor i Bankës së Shqipërisë.

Por, a është ngadalësimi i beftë i rritjes së çmimeve, një tregues se ekonomia mund të përballet me një tjetër goditje të kërkesës për konsum? Ekspertët e Bankës thonë se është ende shpejt për të gjykuar. I sigurt duket fakti se, ky është një trend çmimesh, të cilin Banka – por jo vetëm ajo – do të kishte dashur ta evitonte, pasi me gjasa mund t’i imponojë të tjera lëvizje në politikën monetare.

Dhe ky tashmë po shndërrohet në një film, sekuencat e të cilit përsëriten pa mbarim.

Top Channel