Forcat ukrainase kanë ndërmarrë një operacion në shkallë të gjerë ushtarake kundër separatistëve pro-rusë në lindje të vendit, disa orë pasi armëpushimi mes palëve skadoi.
Bazat e rebelëve dhe bastionet e tyre u gjendën nën sulmin e aviacionit dhe artilierisë, deklaruan burime pranë qeverisë ukrainase.
Armëpushimi 10-ditor përfundoi mbrëmjen e së hënës, me presidentin Petro Poroshenko që deklaroi se, elementë kriminalë kishin cënuar shansin për paqe.
Liderët perëndimorë dhe Rusia i kishin bërë thirrje atij që ta zgjaste më tej armëpushimin. Ndërkohë, ofensiva në lindje të vendit u njoftua të martën edhe nga kryetari i Parlamentit, Oleksandër Turchynov, i cili foli para deputetëve.
“Mund t’ju informojë se në mëngjes faza aktive e operacionit anti-terror u përsërit. Forcat tona të armatosura po kryejnë sulme ndaj bazave terroriste dhe pikave të tyre të kontrollit”, tha ai.
Presidenti Poroshenko u shfaq në një fjalim televiziv natën mes së hënës dhe së martës, duke thënë: “Ne do të sulmojmë, do të çlirojmë tokën tonë”.
Presidenti ukrainas është ndodhur nën një presion të madh nga protestuesit që bëjnë thirrje për përsëritjen e operacioneve kundër separatistëve. Të dyja palët kanë akuzuar njëra-tjetrën se e kanë shkelur armëpushimin.
Një telekonferencë 4-palëshe e zhvilluar të hënën mes Poroshenkos, presidentit rus Putin, atij francez Hollande dhe kancelares gjermane Merkel kishte dhënë shpresë për një ripërtëritje të armëpushimit.
Por në fjalimin e tij zoti Poroshenko tha: “Vendimi për të mos vazhduar armëpushimin është përgjigjia jonë ndaj terroristëve, militantëve dhe plaçkitësve”.
Top Channel
