Unifikimi i programeve mësimore

“Studenti i Kosovës, kudo qoftë, mund të jetë i lirë të jetë nxënës i shkollës shqiptare dhe anasjelltas. Gjithashtu, nxënësit tanë do mund të ndjekin shkollat në BE, sepse kurrikula e unifikuar është zyrtare e Bashkimit Evropian”, deklaroi ministrja Lindita Nikolla.

“Nuk ka një marrëveshje më kuptimplotë e të realizuar për kombin. Është e parëndësishme se kush ka marrë më shumë nga kush, kurrikula e Kosovës nga ajo e Shqipërisë apo anasjelltas. E rëndësishme është që jemi bashkë”, deklaroi ministri kosovar, Ramë Buja.

“Hapat drejt këtij unifikimi nuk janë një lëvizje drejt bashkimit mekanik përtej kufirit, por një ecje e përbashkët drejt asaj që duam të kemi nesër për gjeneratën e re të shqiptarëve”, deklaroi nga ana tjetër kryeministri Edi Rama.

Kryeministri Rama tha se kjo marrëveshje historike do të çojë para edhe gjuhën shqipe. “Puna për unifikimin përbën mundësinë për të ndaluar rënien e mëtejshme të gjuhës shqipe, për t’i kthyer asaj rëndësinë në sistemin arsimor”, nënvizoi Rama.

Pas pak ditësh pritet të përfundojë edhe marrëveshja me Google, e cila do të ndikojë në shtrimin e infrasturkturës teknkologjike për vijimin e mësimit në shkollat e Shqipërisë.

Ministri kosovar: Sistemi ynë i arsimit është evropian

Por përse Shqipëria zgjodhi sistemin arsimor kosovar? Çfarë ndikimi do të ketë në arsimin shqiptar dhe a do të shkojmë ne ashtu si dhe Kosova drejt një teksti të vetëm. Ministri kosovar i Arsimit, Ramë Buja tha se ky sistem europian ka rezultuar i suksesshëm për ta.

“Fëmijët tanë do mësojnë me libra të njëjtë dhe kjo do na bëjë të jemi më shumë bashkë. Modeli ynë është 5+4+3, Shqipëria e ka pasur më ndryshe dhe ka vendosur duke e krahasuar me modele të tjera. Ky model shton mundësitë dhe aftësitë e të qenit kompetentë të nxënësve në lëndët ku ata janë më mirë. Me unifikimin do të ndodhë diçka shumë e mirë dhe do realizojmë tekste të profesionalizuara”, sqaroi Buja.

Top Channel