Gjete punë? Si po ecën me punën? Vazhdon të jesh në të njëjtin vend pune? Kur takohemi me dikë, pasi e pyesim për shëndetin, pyetjet më të shpeshta që i bëjmë njëri-tjetrit lidhen me punën.
Prindërit tanë thoshin dikur se, nëse firmos në fund të muajit, dmth nëse ke një vend pune, konsiderohesh me shumë fat. Në fakt, në ditët e sotme po bëhet gjithmonë e më e vështirë për të gjetur një vend pune.
Sipas anketës tremujore të forcave të punës, të publikuar nga INSTAT për tremujorin e katërt të vitit 2013, te personat mbi 15 vjeç shkalla e papunësisë ka arritur në 16.7%: grupmosha 15-64 vjeç 17%, papunësia te grupmosha 15-29 vjeç ka qenë 28.1%, dhe për personat nga 30 deri në 64 vjeç ka arritur në 13.5%.
Sipas grafikut, shkalla e papunësisë është më e lartë te meshkujt, se sa te femrat. Ndërkohë që shkalla më e lartë e papunësisë i përket grupmoshës 15 deri në 29 vjeç.
Sipas INSTAT, shkalla e papunësisë së regjistruar, për tremujorin e katërt të 2013-s, në total është 13.5%
Ndërkohë, punëkërkues të papunë të regjistruar për Shqipërinë janë 143.947; të regjistruar për herë të parë në zyrat e punës janë 12,077; punëkërkues të papunë të regjistruar të moshës 15-29 vjeç janë 38,652; punëkërkues të papunë të regjistruar me aftësi të kufizuar janë 1,984; punëkërkues të papunë të regjistruar romë/egjiptianë 9,685.
Ndërkohë, sipas Drejtorisë Rajonale të Shërbimit Kombëtar të Punësimit, të dhënat statistikore për 4 mujorin e parë të 2014-s, për zyrën e punës Tiranë, punëkërkues të regjistruar janë 16.748, vende të lira të shpallura janë 5.862 dhe gjithsej janë arritur të punësohen 988 persona.
Top Channel