Siria, plani i ri për largimin e armëve kimike

Organizata për Ndalimin e Armëve Kimike (OPCW) deklaroi të martën se Damasku shpreson që të largojë kimikatet e rrezikshme jashtë vendit brenda fundit të Prillit.

Një e treta e të gjithë sasisë së armëve kimike do të largohet brenda javës, por Siria vazhdon të ketë një sasi të madhe armësh.

Pavarësisht këtyre vonesave, kreu i misionit të OPCW-së tha se “është bërë një progres i mirë për eliminimin e tyre”.

Diplomati holandez, Sigrid Kaag tha se afati i përcaktuar më parë, për shkatërrimin e të gjithë armëve brenda Qershorit është ende i arritshëm.

Plani për çarmatosjen e Damaskut nga armët kimike u negociua nga Shtetet e Bashkuara të Amerikës dhe Rusia gjatë 2013-s.

Shqipëria ishte një prej vendeve që iu kërkua nëse mund të priste procesin e asgjesimit, por qeveria Rama refuzoi këtë mundësi në muajin Nëntor.

Në një zhvillim tjetër, forcat qeveritare të mbështetura nga lëvizja islamike e Hezbollahut vazhduan gjatë ditës bombardimin e qytetit të Yabrudit, bastionit të fundit të kryengritësve në vargmalet Qalamoun.

Top Channel