Kualifikueset për Botërorin “Brazil 2014”, gjatë së cilave u zhvilluan 820 ndeshje në total, kanë sjellë një situatë shumë më të ngushtë në krye të renditjes së FIFA-s për muajin nëntor, edhe pse kreu ka mbetur sërish i pandryshuar, me Spanjën që udhëheq kryesimin, duke lënë Gjermaninë, Argjentinën dhe Kolumbinë pas vetes.
Falë dy fitoreve të saj kundër Suedisë, në “play-off”-et e Europës, Portugalia ka arritur të sigurojë vendin e 5 të renditjes, duke u rikthyer kështu në “Top 10”, së bashku me organizatorët e kampionatit të ardhshëm botëror, Brazilin, që nga ana e tyre fituan ndeshjen miqësore ndaj Honduras (i 41-ti, 7 më poshtë) dhe Kilit (i 15-ti, 3 më poshtë), duke zënë vendin e fundit mes 10 më të mirëve.
Belgjika zbret në vendin e 11-të, 6 vende më poshtë se sa një muaj më parë, ndërsa 3 vende ka humbur edhe Anglia, duke u renditur e 13-ta për nëntorin, edhe pse të dyja këto kombëtare kanë pasur fate të njëjta, pasi mbetën të pamposhtura në kualifikueset e Botërorit, por humbën në dy ndeshjet miqësore në fushat e tyre.
Të gjithë ekipet e 20 vendeve të para, përveç Ukrainës (e 18-ta, ngjitet me 2 vende), kanë siguruar pjesëmarrjen e tyre në Brazil vitin e ardhshëm, ndërkohë që vetëm 3 ekipe të tjera ndër 50 të parat, kanë realizuar ëndrrat e tyre për shfaqjen më të madhe sportive të 2014-s: respektivisht Kameruni (i 51-ti, 8 vende më sipër), Korea e Jugut (e 54-ta, 2 më sipër) dhe Australia (e 59-ta, 2 më poshtë).
Sa i përket ekipit tonë përfaqësues, kuqezinjtë e Shqipërisë të drejtuar nga De Biasi janë ngjitur me 1 pozicion nga muaji i kaluar, tashmë në vendin e 57, me 571 pikë të grumbulluara.
Armenia (34), Venezuela (35), Afganistani (129), Filipinet (133) dhe Guami (169) kanë arritur pozicionet e tyre më ta larta në historinë e renditjes së FIFA-s, që prej 1993 kur u lançua ky sistem.
Renditja e FIFA-s për Nëntorin, 20 vendet e para
Kombëtarja Pikët
1. Spanjë 1 507
2. Gjermani 1 318
3. Argjentinë 1 251
4. Kolumbi 1 200
5. Portugali 1 172
6. Uruguaj 1 132
7. Itali 1 120
8. Zvicër 1 113
9. Holandë 1 106
10. Brazil 1 102
11. Belgjikë 1 098
12. Greqi 1 055
13. Angli 1 041
14. SHBA 1 019
15. Kili 1 014
16. Kroaci 971
17. Bregu i F. 918
18. Ukrainë 907
19. Francë 893
20. Meksikë 892
Top Channel
