Arabia Saudite refuzon zyrtarisht vendin në KS
13/11/2013 02:30
Forcat izraelite bombardojnë Libanin, raportohet për dhjetëra të vdekur e të plagosur 24/11 22:56
Arabia Saudite ka informuar zyrtarisht Sekretarin e Përgjithshëm të OKB-së, Ban Ki-moon, se nuk do ta marrë vendin e anëtarit jo të përhershëm në Këshillin e Sigurisë, duke i hapur rrugën Jordanisë të zërë vendin tradicional arab në trupën më të fuqishme të OKB-së.
Përpara letrës së të martës, nga ambasadori i Arabisë Saudite në OKB, Abdallah Al-Moualimi, për Sekretarin e Përgjithshëm, nuk kishte asnjë njoftim zyrtar për OKB-në mbi vendimin e sauditëve.
Shumë diplomatë dhe zyrtarë të OKB-së thanë se njoftimi formal ishte esencial për Asamblenë e Përgjithshme, për të zgjedhur një kandidat tjetër.
Arabia Saudite shokoi botën diplomatike me njoftimin e paprecedent, duke refuzuar vendin në KS, më pak se 24 orë pasi ishte zgjedhur më 17 tetor.
Ministria e Jashtme akuzoi Këshillin e Sigurisë se kishte dështuar t’i jepte fund konflikteve siriane dhe izraelito-palestineze, dhe në thirrjen e një konference për krijimin e zonës së Lindjes së Mesme të lirë nga armët e shkatërrimit në masë.
Pas njoftimit të sauditëve, kombet arabe dhe shtetet e tjera nxitën Arabinë Saudite të mbante vendin e tij, por javën e kaluar u bë thuajse e qartë se qeveria ishte e vendosur në refuzimin e saj, ndaj dhe tashmë vendi do t’i kalojë Jordanisë.
Ministria e Informacionit të Jordanisë tha gjatë së hënës se mbretëria është e etur për të marrë vendin në Këshillin e Sigurisë. Zgjedhja e Jordanisë, që kërkon 2/3-tat e Asamblesë prej 193 anëtarësh, është tashmë pothuajse e sigurt.
Në letrën e tij, të siguruar nga “Associated Press”, Al-Moualimi tha se “Arabia Saudite, për fat të keq, nuk do të ketë mundësi për të rimarrë vendin e saj”, duke cituar arsyet e dhëna prej Ministrisë së Jashtme, por ai rikonfirmoi angazhimin e qeverisë në OKB.
Top Channel
