Ashtu si në mbarë vendin, edhe në qytetin e Kavajës është festuar Fiter Bajrami.
Kavaja është qyteti që dallohet për atmosferën dhe festimin masiv të kësaj dite të shënuar, që pason muajin e agjërimit për besimtarët.
Edhe këtë vit, bashkia e qytetit ka qene pjesë e festimeve. Pas faljes së namazit të kësaj dite është ndarë për qytetarët, pavarësisht përkatësisë fetare, torta e Bajramit.
E shndërruar në simbol të festimeve në komunitet, torta e porositur për këtë festë ishte 25 metra e gjatë.
“Uroj të gjithë besimtarët e Kavaës, të gjithë myslimanëve, gëzuar Fiter Bajramin, paqe, begat dhe lumturi në familjet e tyre”, deklaroi kryebashkiaku Rroshi.
Një urim për besimtarët është përcjellë dhe nga tenori kavajas me famë ndërkombëtare, Agim Hushi: “Kam ardhur me familjen të festoj këtë ditë të mrekullueshme Fiter Bajramin, e i uroj Kavajës të zhvillohet, teksa e gjej më të bukur se kurrë”.
Më tej festa dhe urimet janë zhvendosur nga sheshi kryesor në ambjentet familjare të besimtarëve.
Top Channel
