Sequi: Prioritet axhenda evropiane

“Diskutuam për rrugën evropiane të Shqipërisë dhe sfidat që ka vendi përpara. Diskutuam edhe për faktin se axhenda evropiane është në qendër të axhendës qeveritare. I theksova zotit Rama mbështetjen e BE-së për të vënë në zbatim këtë axhendë”, ka deklaruar Sequi.

Diplomati evropian ka vlerësuar deklaratën e zotit Rama se në legjislaturën e re do të mbizotërojë gjithëpërfshirja dhe jo përjashtimi dhe ka shprehur bindjen se pas zgjedhjeve fryma e kompromisit do të bëhet element i ri i politikës shqiptare.

“Shpresojmë që procesi zgjedhor do përfundojë në mënyrën dhe kohën e duhur. Duhet një tranzicion i butë i pushtetit politik”, ka sugjeruar Sequi.

Më tej, duke u fokusuar tek integrimi, ambasadori ka theksuar se Bashkimi Evropian i ka dyert e hapura për vendet e Ballkanit, duke vënë në dukje se Kroacia është shembulli më i mirë për këtë perspektivë.

“BE u kthye dje në një bllok me 28 shtete. Përvoja e Kroacisë do të ishte e mirë për Shqipërinë. Kjo dëshmon se perspektiva evropiane e vendeve të rajonit është e hapur dhe premtuese”, ka thënë Sequi.

“Besoj se Shqipëria ka gjithë potencialin dhe energjitë për të ecur në këtë proces. Shpresoj që statusi kandidat të jetë arritja e parë në këtë drejtim. Ai është i mundur të merret në dhjetor”, ka shtuar ai.

Top Channel