Brukseli: Bëni zgjedhje me standarde

17/06/2013 00:00

Kur kemi hyrë në ditët finale të fushatës për garën e 23 qershorit, nga Brukseli vazhdojnë të apelojnë për një proces transparent dhe brenda standardeve europiane.

Komisioneri për Zgjerimin, Stefan Fule dhe Përfaqësuesja e Lartë për Politikë të Jashtme e Bashkimit Europian, Catherine Ashton nëpërmjet një deklarate të përbashkët vënë theksin tek rëndësia e këtyre zgjedhjeve për rrugën europiane të Shqipërisë.

“Zgjedhjet parlamentare në Shqipëri paraqësin një test të rëndësishëm për institucionet demokratike dhe për rrugën e vendit drejt Bashkimit Europian. Ne vazhdojmë të vëzhgojmë nga afër përgatitjet dhe inkurajojmë korigjimin e mangësive të gjetura në raportin e përkohëshëm të OSBE/ODIHR”, thuhet në deklaratën e Ashton dhe Fule.

Komisioneri dhe Përfaqësuesja e Lartë ndalen vecanërisht tek situata me Komisionin Qendror të Zgjedhjeve.

“Është thelbësore që liderët politikë të gjejnë një mënyrë të pranueshme nga të gjithë për të bërë plotësisht funksional Komisionin Qendror të Zgjedhjeve. Është përgjegjësi e klasës politike shqiptare që të forcojë besimin e publikut mbi procesin zgjedhor si dhe të krijojë kushtet që rezultati zgjedhor të jetë i pranueshëm nga të gjithë”, thuhet më tej në deklaratë.

Përveç kësaj deklarate, burime konfidenciale në Bruksel rrëfyen për Top Channel se në këto zgjedhje do të marrin pjesë si vëzhgues edhe zyrtarët apo diplomatët që mbulojnë Shqipërinë nga ato vende  anëtare të BE-së që i konsiderojnë zgjedhjet e lira dhe të ndershme si kusht parësor për dhënien e statusit kandidat dhe përparimin e mëtejshëm të vendit në rrugën drejt BE-së.

Pergatiti ARTA TOZAJ

Top Channel