Kryeministri Sali Berisha ka shprehur pakënaqësi të hapura mbi mënyrën
se si ndërkombëtarët po menaxhojnë krizën e Eurozonës, e cila sipas tij,
po dëmton ekonomitë e rajonit.
“Kemi të bëjmë me një krizë të thellë në qendër, e cila rrezaton drejt periferisë dhe ndikon në mënyrë negative vazhdimisht. E vërteta është që përqendrimi për ta kufizuar këtë krizë në zonën, ku ajo ndodhet është pothuaj inekzistent”, tha Berisha.
Zoti Berisha mendon se jo vetëm Bashkimi Europian, por edhe FMN-ja dhe Banka Botërore nuk po marrin masa konkrete për të ndalur përhapjen e krizes tek ekonomitë e Ballkanit Perëndimor.
“Një takim u bë në Tokio, por të reja të veçanta nuk dëgjuam”, tha Berisha.
Kritika pati edhe nga Guvernatori Ardian Fullani, i cili i ka kërkuar Bashkimit Europian trajtim preferencial dhe financime direkte për vendet në zhvillim të Ballkanit.
“Apelojmë për krijimin e mekanizmave dhe instrumentave të përshtatshëm të financimit me likuiditet nga ana e Bashkimit Europian për vendet periferike të Eurozonës”, tha Fullani.
“Thirrja ime si për Komisionin Europian, por në mënyrë të veçantë për institucionet e Bretton Wood, që të përpunojnë një strategji ndihme në mënyrë që të kufizohet kriza ekzistuese dhe të parandalohet përhapja e saj”, tha Berisha.
Dy zyrtarët e lartë kanë shfrytëzuar konferencën e dhjetë ndërkombëtare mbi politikën monetare për të kërkuar mbështetje më të fortë nga institucionet financiare të Botës.
Top Channel