Pylli i Bozdovecit në flakë

Tashmë  është djegur më tepër se tre të katërtat e sipërfaqes totale të Parkut “Bredhi i Drenovës”, pavarësisht punës nga punonjësit e shërbimit pyjor.

Për shkak të terrenit të vështirë malor është thuajse e pamundur që të ketë një përmirësim të situatës përmes punës me krahë, ndërsa prefekti i Korçës e ka konsideruar situatën problematike sa i takon dëmit të madh të turizmit. Ai thote se ndërhyrja e vetme eshte ajo nga ajri.

“Problematike mbetet situata në pyllin e Bozdovecit, ndërkohë që vazhdojnë në terren të jenë rreh 100-120 forca të komunës dhe zjarrëfikëse. Aktualisht vazhdon prerja e pyllit për të krijuar korridore që të ndërpresin përhapjen e zjarrit. Kemi kërkuar ndihmë nga ajrit për të hedhur sasi ujë në këtë zonë dhe sidoqoftë, forcat e njerëzve janë atje dhe mundohen të kufizojnë përhapjen”, deklaroi prefekti i Korçës, Andrea Mano.

Ndërkohë, vijojnë të jenë aktive edhe disa vatra të tjera zjarri në Qarkun e Korçës. Kështu në Malin e Bardhë vatra është ende aktive, në Dardhë zjarri është vënë nën kontroll, ndërsa është shuar në pikën turistike të Voskopojës, ku u dogjën më tepër se 50 hektarë me pyje.

MB: 29 vatra zjarri në gjithë vendin

Ministria e Brendshme raportoi në orët e mbrëmjes së të mërkurës për situatën e krijuar nga vatrat e zjarrit në shkallë republike. Sipas kësaj ministrie, aktualisht në vend numërohen 29 vatra aktive zjarri. Qarqet me problematike janë ai i Dibrës, Korçës, Elbasanit, Kukësit, Lezhës dhe Shkodrës.

Në Korçë është një vatër zjarri aktive, ndërsa dy vatra të tjera janë të izoluara nga forcat zjarrfikëse dhe punonjësit e policisë pyjore. Lajmi i mirë që mbërrin nga ky qark është përparimi në fikjen e flakëve të rëna në Parkun e Bozdovecit.

Në Kukës shqetësuese mbetet situata e krijuar nga zjarri i rënë në Komunën Tërthorë në Bjeshkët e Bardhocit. Në qarkun e Lezhës problematike është situata në rrethin e Mirditës me pesë vatra zjarri, 2 në Rrëshen dhe 3 nëpër fshatrat e zonës. Në Qarkun e Elbasanit është një vatër e re zjarri në rrethin e Librazhdit drejt së cilës janë nisur forcat zjarrfikëse, ndërkohë që në Qarkun e Tiranës vazhdon të mbetet problematike vatra e zjarrit në Malin e Dajtit në lartësitë e Priskës.

Top Channel